Tolosaldea LHII: Lanbide Heziketa berritzailea, sektore estrategikoetan begirada jarrita duena

Tolosaldea Lanbide Heziketako Ikastetxe Integratuak kalitatezko lanbide prestakuntza aurreratua eta berritzailea eskaintzen du. Ikastetxe publiko honen eskaintza askotarikoa da, proiektuetan eta metodologia berrietan oinarritua, eta enpresa zein erakundeei zerbitzua ematen dien ereduan oinarritzen da.

Partaidetza, prestakuntza eta elkarlana oinarri hartuta, pertsona arduratsu, ekintzaile, eleaniztun eta trebeak heztea du helburu, eta horretarako irakaskuntza pertsonalizatua eta metodologia aktiboak erabiltzen ditu. Gainera, kalitatea eta berrikuntza bermatzeko, Tknika zentroarekin lankidetza estuan aritzen da.

Tolosaldea LHII erreferentziazko zentro bilakatu da azken urteetan, eta 2024-2025 ikasturtean 900 ikasletik gora ditu. Azken hamarkadan ikasle kopurua bikoiztu du, eta laneratze-tasa %94koa da.

Hezkuntza-eskaintza zabalari esker, arratsaldeko ordutegian langileentzat, langabetuentzat eta enpresentzat neurrira diseinatutako ikastaroak ere eskaintzen ditu ikastetxeak. Era berean, enpresei laguntza teknologikoa ematen die eta hainbat proiektu garatzen ditu haiekin elkarlanean.

Paper Eskola: kimikagintzaren aldeko apustua

Aurreko ikasturteaz geroztik, Tolosaldea LHIIk Tolosako Paper Eskola kudeatzen du. Bertan Kimikagintzako erdi eta goi mailako ziklo berriak eskaintzen ari da. Honek sektore estrategiko honi bultzada ematen dio, eta prestakuntza aukera berriak sortzen ditu, ikasleei sektoreko azken teknologiekin harremanetan jartzeko aukera eskainiz.

Hezkuntza-eskaintza zabala

2024-2025 ikasturterako, ziklo berriak martxan daude, besteak beste, fabrikazio mekanikoko diseinua, gizarte eta kirol irakaskuntza eta animazioa, eta kimikagintzako goi eta erdi mailako zikloak. Honela, gero eta arlo gehiagotan eskaintzen du Tolosaldea LHIIk lanbide heziketa espezializatua.

Metodologia aurreratuak

Hezkuntzaren eraldaketa fase honetan, Tolosaldea LHII metodologia berritzaileen abiapuntu sendoa da: ikasketa kolaboratiboa sustatzen du eta gaitasun zeharkakoen garapenari garrantzi berezia ematen dio. Horretarako, irakasleen konpromisoa eta prestakuntza etengabea ezinbestekoak dira.

Gertutasuna eta jarraipen pertsonalizatua

Ikasleen arrakasta bermatzeko elementu nagusietako bat tutorizazio pertsonalizatua eta gertuko arreta dira. Ikasleen egoera eta bilakaera modu egokian jarraitzea da helburua, eta horretarako bitartekoak eskaintzen dituzte.

Eredu eleanitza

Eleanitza proiektuari esker, ikasleek ikasgai batzuk ingelesez ikasteko aukera dute, hizkuntza gaitasuna eta lan-munduan baliagarriak diren trebetasunak garatuz.

Bikaintasun sarea eta sektore estrategikoak

Mekatronika Industriala sektore estrategikoan, Estatuko bikaintasun sarean sartua izan da Tolosaldea LHII. Horri esker, milioi bat euroko diru-laguntza jasoko du aurkeztutako proiektua martxan jartzeko.

Heziketa Duala eta praktikak

Bigarren ikasturteko ikasleek ikasgelako eta enpresako edukiak uztartzen dituzte, lan-munduan esperientzia lortzearekin batera soldatapeko praktikak eginez. Bestalde, lehenengo mailako ikasleek ere hiru asteko praktikak egiten dituzte enpresetan, maiatzean.

Bigarren mailako azken hiru hilabeteak ere praktikak egiteko izaten dira. Erasmus+ programari esker, atzerriko hainbat herrialdetan ikasketak eta praktikak egiteko aukera dago, esperientzia pertsonala eta profesionala zabalduz.

Ekintzailetza sustatzeko programa

Ikasenpresa programa ziklo guztietan eskaintzen da, ekintzailetza gaitasunak garatzea xede: sormena, berrikuntza, talde-lana, ekimena, lidergoa edo konpromisoa bezalako trebetasunak barneratuz.