Lurraldeko hainbat ikastetxetako Derrigorrezko Bigarren Hezkuntzako (DBH) 4. mailako 300 ikaslek parte hartuko dute urriaren 23an Gipuzkoan egingo diren STEM jardunaldietan, eremu zientifiko-teknologikoekin lotutako lan-aukerak ezagutzeko.

Ikasleek euskal sektore industrialeko, zientifikoko eta teknologikoko berrogei profesionalekin hitz egingo dute, STEAM Sareri esker, hau da, euskal gazteek matematika, zientzia eta teknologiarekiko duten interesa areagotzeko eta haien ikaskuntza hobetzeko elkarrekin lan egiten duten ikastetxeen eta eragile sozioekonomikoen sareari esker.

Helburuak

Topaketek hitzordu azkarraren formatua izango dute, ikasle bakoitzak bost profesionalekin hitz egiteko aukera izan dezan. Hezkuntza-eragileen egoitzetan egingo dira, bai unibertsitateetan, bai lanbide-heziketako zentroetan.

Jardunaldiak hilaren 23an, asteazkena, izango dira Deustuko Unibertsitatean (Donostia) eta Mondragon Unibertsitatearen Galarretako campusean. Eusko Jaurlaritzaren STEAM Euskadi Estrategiaren barruan, lanbide-orientazioko jardunaldi hauek Zientzia, Unibertsitate eta Berrikuntza Sailak eta Hezkuntza Sailak bultzatzen dituzte, Innobasque Berrikuntzaren Euskal Agentziarekin lankidetzan, eta Deustuko Unibertsitatearekin, Mondragon Unibertsitatearekin, UPV/EHUrekin, Hetelekin, Ikaslanekin eta AICE-IZEArekin batera antolatzen dira.

Ekimen honen helburuak dira DBHko 4. mailako ikasleei beren prestakuntza- eta lanbide-hautaketan laguntzea, STEM lanbideen aniztasuna erakutsiz profesionalekin harreman zuzena izanez, eta bokazio eta asmo profesionalak sortzea STEM eremuetan, bereziki nesken artean. Guztira, programaren edizio honetan Euskadi osoko 32 ikastetxetako 1.300 ikaslek eta STEMeko 225 profesionalek hartuko dute parte.

Banakako hitzaldiak

Ikasleen eta STEM profesionalen arteko topaketak 15 minutuko blokeetan egituratuta egongo dira. Bloke bakoitzean, bost ikasleko talde batek profesional batekin hitz egingo du bere interes eta motibazio profesional eta pertsonalei buruz. Profesional bakoitzak bere ibilbide akademikoa eta profesionala kontatuko du, eta bere enpresan egunero dituzten erronkak azalduko ditu.

2024-2025 ikasturte honetan STEAM Sare sareak 207 ikastetxek eta 99 erakunde laguntzailek parte hartzen dute. Erakunde laguntzaile horien artean daude, besteak beste, CIE Automotive, Sidenor, UPV/EHU, Cikautxo, Danobat Group, Orona, DIPC (Donostia International Physics Center), Iberdrola, Mercedes Benz edo Neiker.