Euskarazko bozgorailu adimenduna garatzeko proiektua martxan da
Mycroft.eus egitasmoa Europa Language Grid laguntza-deialdian hautatu dute
Euskaraz ulertzeko eta hitz egiteko gai izango den Mycroft.eus bozgorailu adimenduna garatzeko proiektua jarri dute martxan Elhuyarrek, Skura kooperatibak eta Talaios kooperatibak. Horretarako, Mycroft Al software libreko gailua egokituko dute Elhuyarren bi sistema hobetuz eta integratuz: hizketaren ezagutza eta sintesia, biak ala biak adimen artifizialean eta Deep Learning teknologian oinarrituta garatuak.
Euskara eremu digitalean sendo egon dadin, beharrezkoak dira hainbat eragileren jakintza, ezagutza eta elkarlana. Egitasmo honek horixe du helburu, punta-puntako teknologia garatzeko norabide berean ariko diren erakundeen indarrak metatzea, administrazioaren babes eta laguntzarekin.
Proiektuak urtebete iraungo du eta Gipuzkoako Foru Aldundiko Etorkizuna Eraikiz ekimenaren babesa jaso du, Eusko Jaurlaritzak enpresen I+Ga bultzatzeko duen Hazitek programaren laguntzaz gain.
Mycroft.eus Errenteriako Torrekua eraikinean garatuko da, izan ere, gaur egun teknologia-burujabetzako estrategiak garatzeko beharrezkoak diren ekonomia sozialeko harremanak eta teknologia libreen garapenak saretzen ari baitira bertan, hainbat proiekturen inguruan.
Nabarmentzekoa da proiektuak Europan jaso duen babesa eta laguntza ere. Europa Language Grid laguntza-deialdira aurkeztutako Europa osoko 110 proiektuen artean hautatuetako hamarretako bat izan da Mycroft.eus, Espainia eta Frantziako eremu administratiboan bakarra.
Bozgorailu berriak erabiltzaileen pribatutasuna bermatuko du, eta genero-ikuspegia izango du txertatuta. Horrez gain, Elhuyarren ahotsaren ezagutza eta sintesia bozgorailuen domeinura egokituko da eta tokiko gaitasunak garatuko dira, euskarazko bozgorailuak Euskal Herriko albisteak, musika eta erosketak lehenetsi ditzan.
Temas
Más en Sociedad
-
La Diputación de Gipuzkoa amplía el servicio de apoyo a familias cuidadoras de dependientes
-
El Programa de Vida Independiente pone el foco en los jóvenes con discapacidad
-
La UPV/EHU ha ingresado 252 millones de euros por su labor investigadora
-
No habrá orgía de 8.000 personas en el Viña Rock: "Se ha sacado de contexto"