Síguenos en redes sociales:

Zapaburuen biziraupenean eragina dute mikroplastikoek

EHUk CSICekin elkarlanean egindako ikerketa baten emaitzak adierazi du hori

M. Tolosa

10·03·20 | 03:00 | Actualizado a las 19:21

donostia - Mikroplastikoek laku eta ibaietako zapaburuen eta ornogabeen biziraupenari eragiten diote, Euskal Herriko Unibertsitateak (EHU) Madrilgo Natur Zientzien Museo Nazionalarekin (CSIC) elkarlanean egindako ikerketa baten arabera.

UPV/EHUko ikerketa-taldeak bi azterlan egin ditu paraleloan; anfibio baten larben bilakaera (zapaburuak) eta ur gezako ornogabe batena aztertu dituzte, 15 egunetan mikroplastikoen maila desberdineko hainbat kontzentrazioren aurreko esposizioarekiko. Erabilitako kontzentrazio altuenek ondorio hilgarriak izan zituzten, eta maila ertainekoek anfibioen hazkundea gutxitu zuten.

Alde batetik, ikerketa taldeak mikroplastikoek zapaburuengan duten eragina aztertu du, eta baita mikroplastikoak perifitonari atxikitzen ote zaizkion ere (urpeko harkaitzetan hazten diren organismo mikroskopiko hauek dira, hain zuzen ere, zapaburuen elikadura-iturri nagusiak).

Zapaburuak hil egiten dira mikroplastikoen kontzentrazio gorenean; “bestelako kontzentrazioetan ez dugu hilgarritasunik sumatu, baina bai anfibioen hazkundean beherakada bat”, azaldu du EHUko ikertzaile taldeko Naiara Lopez Rojok.

Bigarren kasuan, mikroplastikoek orbelaren deskonposizioan duten eragina aztertu dute, baita hartaz elikatzen diren ornogabe detritu-jaleen biziraupenean eta hazkuntzan zer eragin duten ere.

Emaitzek erakutsi dutenez mikroplastikoek hilkortasuna eragiten diete detritu-jaleei kon-tzentrazio maila guztietan; ez omen dute, ordea, eraginik haien hazkundean.