Imanol Pradales lehendakariak Edmundo Gonzalez Venezuelako "presidente legitimoa eta demokratikoki aukeratua" dela aitortzea eskatu du, eta herrialdean atxilotutako oposizioko kideak askatzeko eskatu du.
Pradalesek bere sare sozialen bidez egin du hausnarketa hori, Nicolas Madurok eta Edmundo Gonzalez oposizioko buruak Venezuelako presidentetza hartuko duten egunean.
2024ko uztailaren 28ko hauteskundeek "berme eta estandar demokratikoak" bete ez zituztela ondorioztatu duten nazioarteko erakundeen ebazpenen berri eman du lehendakariak. Ondorioz, Edmundo Gonzalez Venezuelako presidente izatea babesten dute.
Horren aurrean, Maduroren Gobernuaren erantzuna "oposizioaren errepresioa eta jazarpena areagotzea eta oinarrizko giza eskubideak urratzea" izan dela deitoratu du.
Erregimen autoritarioa
"Venezuelako herriaren eta nazioarteko komunitatearen babesik ez duen erregimen autoritarioa da. Azken gertakaria Maria Corina Machado oposizioko burua atxilotu eta askatzea izan da, Caracasen protesta jendetsua egin ostean", kritikatu du.
Pradalesek, beraz, atxilotutako oposizioko kideak askatzeko eskatu du, baita Edmundo Gonzalez "Venezuelako presidente legitimoa eta demokratikoki hautatua" dela aitortzeko ere.
"Zuzenbide Estatuaren defentsa, giza eskubideen errespetua, eskubide politikoak, adierazpen askatasuna eta boterean errelebo demokratikoa modu baketsuan onartzea eskatzen dugu. Gaur oso egun garrantzitsua da Venezuelarentzat. Gure jarrera, demokrata gisa, eta nirea, lehendakari gisa, Venezuelako herriaren, demokraziaren eta askatasunaren alde dago eta egongo da beti ", argi utzi du.
