2003an atxilotu zuten arte erakunde armatuko taldeen arduradun nagusia omen zen Ainhoa Garcia Montero ETAko buruzagi ohia akusatuen aulkian eseriko du Auzitegi Nazionalak astelehen honetan, 2000. urteko abuztuaren 8an Joxe Mari Korta Adegiko presidente eta enpresariaren aurkako atentatuko erantzukizunak argitu asmoz.
Fiskaltzak 30 urte eta erdiko espetxe-zigorra eskatu du harentzat, azpikeria astungarria izanik hilketa terrorista eta helburu terroristarekin dokumentu ofizialak faltsutzea egotzita.
Zumaiako Gorostiaga industrialdean kokatutako “Korta” izeneko bere enpresatik irteten ari zenean burutu zen 56 urteko Jose Mari Korta hil zuen atentatua. Fiskaltzak behin-behineko ondorioen idazkian azaldu duenez, garai hartan Buruntza komandoko kide zen García Monterok eta dagoeneko zigortuta zegoen taldeko beste kide batek, lapurtutako Fiat Tipo bat enpresaren aurreko aparkalekura eraman, eta biktimak erabili ohi zuen auto baten paraleloan aparkatu zuten.
Goiz erdi aldera, Korta eraikinetik irten eta autora igo zenean, akusatuak eta bere kideak, irratizko gailu bat erabilita lehergailua eztandarazi zuten, ondoan dagoen GI-3760 errepidetik. Fiskaltzak azaldu duenez, Fiat Tipo hori “Erezuma komandoko zehaztu gabeko pertsonek” lapurtu zuten egun batzuk lehenago, zehazki abuztuaren 2an.
Akusatuak eta bere komando kideak matrikula kendu eta faltsua zen beste bat ipini zioten, eta “15 eta 20 kilo arteko gelatina lehergarri edo goma motako dinamita” jarri zuten maletategian, ministerio publikoak idatzitakoaren arabera.
Kartzela-zigorraz gain, biktimaren familiari eta enpresari 300.000 euroko kalte-ordaina ematea eskatu dio Fiskaltzak akusatuari. Atentatu horregatik, Auzitegi Nazionalak 25 eta 27 urteko kartzela-zigorrak ezarri zizkien 2003an Ibon Etxezarretari eta Patxi Xabier Makazagari, hurrenez hurren.
