Pasaia: Ertzaintzak argi utzi du zebrabideak zuriak izan behar dutela

18.01.2022 | 00:26
Asteburuan LGTBIQ+ kolektiboak egindako protesta. Argazkia: N.G.

Pasaia – Ertzaintzaren eta Udaltzaingoaren arteko koordinazio bilera batean, Ertzaintzatik argi utzi zuten zebrabideetako markak zuriak izan behar dutela beti, eta ezin direla beste ezein koloretakoak izan, Pasaiako udal Gobernuak argitu duenez.

Horregatik, LGTBIQ+ kolektiboa babesteko ortzadar kolorez apaindutako Euskadi Etorbideko, Markina Ingeniariaren kaleko eta Eskalantegi kaleko zebrabideak zuriz margotu ziren joan den astean Zirkulazio Araudi Orokorra bete-tzeko xedearekin.

Hala ere, neurri hau ez dute begi onez ikusi ez EH Bilduk ezta LGTBIQ+ kolektiboak. Izan ere, jokabide homofobotzat hartu dute. Gauzak horrela, kolektiboak asteburu honetan San Pedroko zebrabidean gaitzespen ekitaldi bat burutu du, zebrabidean koloretako oinetako markak eta bihotzak margotuz.

Udal Gobernuak defendatu duenez, "seinale horiek kentzea ez da LGTBIQ+ kolektiboaren aurkako erasoa. "Izan ere, gogora dezagun Antxon, Molinaoko itsasadarreko eskailerak ostadar banderaren koloreekin margotu zirela, eta Gobernu honek ez duela inola ere planteatu kentzea, baizik eta ekimen hori babestu dela".

Gainera, Pasaiako Udalak asmoa du LGTBIQ+ mugimenduko kideekin bilera bat deitzea, hiri-altzariak edo beste elementu ba-tzuk pintatzeari dagokionez egin beharreko beste jarduketa batzuk adosteko.

Afera honen aurrean, udal Gobernuak onartu duenez, bere jokaera ez da guztiz zuzena izan: "Akatsa egin dugu jarduteko moduari dagokionez; izan ere, udal sailen arteko koordinazio falta dela eta, zebrabideak zuriz margotu ditugu aurrez LGTBIQ+ kolektiboarekin hitz egin gabe, gure asmoa haiekin hitz egitea bazen ere. Beraz, barkamena eskatu nahi diegu".

noticias de noticiasdegipuzkoa