- Lehorreko ekosistema oso helburu zabala da. Hainbat alor azter daitezke: lehorreko bizitza babestea, lehengoratzea eta modu jasangarrian erabili dadila sustatzea, basoak modu jasangarrian kudeatzea, basamortutzearen aurka borrokatzea, lurren degradazioa gelditzea eta lehengoratzea edota biodibertsitatearen galera gelditzea. Baina Errenterian, ikasturte honetan, zehazki, basoen inguruan arituko dira.

Abiatu berri den 2020-2021 ikasturte honetan, orain arte Eskolako Agenda 21 programa gisa ezagutzen zena Eskolako Agenda 2030ean bilakatu da. Horren baitan, Errenteriako ikastetxeek lehorreko ekosistemetako bizia aztertuko dute.

Programa hau Errenteriako Udalak bultzatzen du eta herriko hainbat ikastetxeek parte hartzen dute: Bizarain LH ikastola, Bizarain DBH ikastola, Cristobal Gamon LHI, Egiluze ikastetxea, Koldo Mitxelena BHI, Orereta ikastola, Telleri-Alde ikastetxea eta Don Bosco LHII dira. Guztira, adin desberdinetako 4.800 ikasle inguru gaian murgilduta, irakasle, ikastetxeko langile, senide eta Udalarekin batera. Ikasturtean zehar, ikasleek emandako urratsen berri emango dute aldiro-aldiro, herritarren hausnarketarako aukera izan dezaten.

Hasierako motibazio fasean, Eskolako Agenda 2030 programak Garapen Iraunkorreko Helburuekin nolako lotura duen aztertzen eta uler-tzen jardun dute programako partaideek. Hemendik aurrera ikastetxeko eta herriko diagnosia egitea egokituko da, basoari lotutako hainbat zalantza argituz (basoa edo landaketa nola desberdindu, nola osatua dagoen, ikastetxe ingurua nolakoa den, Errenteriako hiri-eremuan gune berdeak edo basoak dauden€.). Honela, basoen inguruko argazkia aterako dute ikasleek.

Eskolako Agenda 2030 berri hau, Nazio Batuetako Erakundeak (NBE) adostutako Garapen Iraunkorreko 17 Helburuetan oinarritzen da. Helburu hauek 2015eko irailaren 25ean onartu zituzten NBE osatzen duten 193 herrialdeek, nagusiki mundu mailan pobrezia desagerrarazi, planeta babestu eta pertsona guztien ongizatea bermatzeko.