- Irungo EAJ-PNVren Uri Buru Batzarretik bere desadostasuna eta kezka adierazi nahi dute aste honetan Euskal Autonomia Erkidegoko Justizia Auzitegi Nagusiak iragarri duen epaiagatik. Epai horrek Irungo Udaltzaingoaren zerbitzurako hamabi lanpostuetarako ezarritako hizkuntza-eskakizunak baliogabetzen ditu, uste baitu "diskriminatzailea" dela plaza bat eskuratzeko euskararen ezagutza eskatzea. "Irmoki salatu nahi dugu egoera hori, eta Irungo Udalari gure exijentzia azaldu nahi diogu -hala nola, erabakia hartzen badu, laguntza eman-, epairen helegitea bultza-tzeko, hari aurre egiteko behar diren baliabideekin, eta, horrela, Irungo herritar guztien hizkuntza-eskubidea modu berean defendatu eta aldezteko", zioten jeltzaleek ohar baten bidez. Azken hamarkadetan euskararen erabileran egindako bidean "atzerapauso bat bera ere onartzeko prest" ez daudela adierazi zuten EAJtik bere komunikatuan.