Síguenos en redes sociales:

Sagardo Eguna ospatuko dute igandean Zarautzen

Eguerdiko 12.00etatik 14.00etara izango da Lege Zaharren Enparantzan eta zortzi sagardogile bilduko dira bertan

Sagardo Eguna ospatuko dute igandean ZarautzenPedro Amundarain

Sagardo Eguna ospatuko dute igande honetan Zarautzen. Zurekin ostalarien elkarteak antolatu du, beste urte betez. Lege Zaharren Enparantzan egingo da eguerdiko 12.00etatik arratsaldeko 14.00etara.

Zortzi sagardogilek hartuko dute parte

Aurtengoan, zortzi sagardogilek hartuko dute parte igandeko ekitaldian. Bertaratzen direnei euren produkturik onena eskaintzea izango dute helburu. Hurrengo hauek hartuko dute parte: Aburuza (Aduna), Altuna (Urnieta), Ekain (Zestoa), Izeta (Aia), Lizeaga (Astigarraga), Petritegi (Astigarraga), Satotxa (Aia) eta Urdaira (Usurbil).

Zarauzko Sagardo Eguneko kartela.

Sagardoarekin batera, Euskal Parrilla ere bertan izango da. Txuleta pintxoak unean bertan prestatzen egongo dira.

12 euro, bertsoak, dantza... eta omenaldia

Sagardo Egunean parte hartzeko 12 euroko txartela erosi behar izango da. Prezio horren barruan sagardo dastaketa, kopa bat eta txuleta pintxoa sartzen dira. Gainera, antolakuntzak berrerabilpena sustatu nahi du eta, horregatik, kopa itzultzen duenari bi euro itzuliko zaizkio. Gauzak horrela, txoktx-a 10 eurotan irtengo zaie herritarrei eta bertaratzen direnei. Txuleta pintxoak lau euroko prezioa izango du.

Gastronomiaz gain, osagai gehiago egongo dira. Bertsolaritza, dantza eta txistu saioak egongo dira Lege Zaharren Enparantzan. Horrez gain, aurtengo edizioak une hunkigarri bat izango du: Felix Borda eta Marian Dulantori omenaldia egingo zaie. Euskalduna jatetxeko nagusi ohiak izan dira urte luzez eta sektoreari egin dioten ekarpena eta egindako lana aitortuko zaie bertan.