Marmitakoaren usaina Hondarribira itzuliko da uztailaren 25ean

Dena prest dago uztailaren 25ean, Santiago egunean, Hondarribian egingo den III. Marmitako Txapelketarako. Zumardikoak elkarteak antolatutako lehiaketa gastronomikoa Damarri plazan egingo da, goizeko 10.00etatik aurrera, eta herritarren partaidetza zabala espero da.

Parte hartu nahi dutenek uztailaren 24a baino lehen eman behar dute izena, 621 154 622 telefono zenbakira deituta. Antolatzaileen arabera, orain arte ia hogei lagunek baieztatu dute izena emango dutela.

Txapela eta garaikurra

Lehiaketan parte hartzen dutenek beren sukaldeko tresnak eta osagai guztiak eraman beharko dituzte, hegaluzea izan ezik, antolakuntzak jarriko baitu. Marmitakoa prestatzeko bi ordu izango dituzte parte-hartzaileek, eta eguerdiko 12.00etatik aurrera, epaimahai batek dastatu eta baloratuko ditu aurkeztutako platerak.

Epaimahaia Hondarribiko ostalaritza arloko adituek eta itsas munduarekin lotura duten pertsonek osatuko dute, hala nola saregileek, arrantzale ohiek edo arrantzaleen senideek. Aurreko edizioetan bezala, marmitakorik onenak txapela eta oroigarrizko garaikurra jasoko ditu.

Marmitakoa dastatzeko aukera

Lehiaketa ikustera hurbiltzen direnek marmitakoaren razio bat dastatzeko aukera izango dute plazan bertan, edo tupper batean eraman ahal izango dute.

Zumardikoak elkarteak eskerrak eman dizkie Hondarribiko Udalari, HAZI Fundazioari, Done Pedro Itsas Gizonen Kofradiari eta Kofradia Itsas-Etxeari ekimen hau posible egiteagatik, eta herritarrak animatu ditu egun berezi honetan parte hartzera.