Zumarraga: adin ezberdinekoen arteko loturak sortzen

Asteazken honetan, ZumarragakoEuskadi plazan, adin ezberdinetako herritarrek elkarrekin jolastu zuten. Herriko belaunaldi zaharrenen esperientziaz baliatuz, jolas ezberdinak probatu eta ikasteko aukera izan zuten. Gure-Txoko eta El Salvador jubilatu elkarteen eskutik, eta Zumarragako Udalaren laguntzarekin.

Gure-Txoko

Egitasmoaren helburua egun batez teknologia albo batera uztea eta adin ezberdinekoak elkartzea izan da. Gaur egun teknologiak garrantzi handia du, eta nahiz eta esparru askotan hau onuragarria izan daitekeen, haurtzaroan ikaste eta jolas prozesuan duen eragina zalantzan jartzen da. Jolas hauen bitartez, adin ezberdinekoen arteko loturak sortu nahi dira, aurreiritziak baztertuz, eta esperientzia aberasgarriak partekatuz, bai aisialdi mailan, baita ere maila emozionalean.

Sustatzaileak

Ekimen hau Kutxa Fundazioak eta Arantzazulabek sustatzen duten Hitzetatik Ekintzetara egitasmoaren parte da. Proiektu berritzaile honek gizartea 2030 Agendara hurbildu nahi du, gizartean inpaktu positibo bat modu erraz eta erakargarrian eragiteko. Iaz gose eza (garapen jasangarrirako bigarren helburua) izan zuen jomugan proiektuak, eta aurten Hiri eta Komunitate Jasangarriak dira aztergai (garapen jasangarrirako hamaikagarren helburua).

Hitzetatik Ekintzetara egitasmoari esker, kausa desberdinetan ekarpena egitea erraza, erakargarria eta dibertigarria da. Hirugarren sektore eko-sozialeko eragileekin lankidetzan, ekintza programa zabala osatu da. Maiatzetik ekainera, 16 jarduera egingo dira lurralde osoan.