Síguenos en redes sociales:

Oiartzunen auzo batzarrak antolatu dira legealdi plana azaltzeko

Bilerak urriaren 2tik 19ra burutuko dira eta 2024ko aurrekontu proposamena ere aukeztuko da

Aitziber Muga

30·09·23 | 05:25 | Actualizado a las 22:56

Oiartzunen auzo batzarrak antolatu dira legealdi plana azaltzekoN.G

Datorren astetik aurrera, Oiartzungo Udal Gobernuak auzoko bilerak burutuko ditu herritarrei 2023-2027 legealdiko plana eta 2024ko aurrekontua aurkezteko. Era berean, ekarpen gehiago bildu nahi dituzte plana aberasteko.

“Oiartzuar guztien bizitza hobetzeko” lan egingo dutela adierazi du Joana Mendiburu alkateak, “herritarrekin eta Oiartzungo eragile sozial eta agente ekonomikoekin batera”. Planean herritarren lehentasunak jaso dituztela azpimarratu du alkateak.

Oiartzungo Udalean ohikoa den lanketa publiko-komunitarioan sakondu eta “arlo gehiagotara” zabaldu nahi dute: energia, sozioekonomia eta elikadura esparruetara, besteak beste. Elkarlan publiko-komunitarioa martxan jarriko dituzten “egitasmo guztien oinarria” izango dela nabarmendu du.

Egutegia honakoa da: urriak 2, Ergoienen, Auzokalte elkartean; urriak 3, Karrikan, Artaso elkartean; urriak 4, Elizalden, pleno aretoan; urriak 9, Altzibarren, auzo lokalean; urriak 10, Iturriotzen, auzo lokalean; urriak 16, Arraguan, Aldeguna elkartean; urriak 17, Ugaldetxon, auzo lokalean; eta urriak 19, Gurutzen, Bizardia elkartean.

Batzar guztiak 19.00etan hasiko dira.