Euskaraldia: 1.619 urretxuarrek eta zumarragarrek parte hartuko dute

1.619 bizilagunek eman dute izena Euskaraldian. Horretaz gain, erabilera handitu asmoz, Urretxu eta Zumarragan 151 entitatek (enpresa, elkarte, denda, taberna…) ere eman dute izena ariguneren bat dutelako: guztiek euskaraz ulertzen duten gunea. Talde motorrak hainbat ekitaldi antolatu ditu.

Hilaren 24an, 17:00etatik 19:00etara, Parketarrak egitasmoko saioa egingo dute Zumarragako trintxeran. Haurrek euskaraz jolastuko dute. Hilaren 25ean, 20:15ean, Eñaut Elorrietak disko berria aurkeztuko du Zumarragako Zelai Arizti aretoan.

Hilaren 29an, 19:00etan, Fermin Etxegoien idazlea irakurle taldekoekin elkartuko da eta Totelak liburuari buruz hitz egingo dute. Saioa Urretxuko kultur etxean izango da.

Abenduaren 2an, 16:30etik 18:30era, bertso eskolako kideek bertso saio ibiltaria egingo dute. Abenduaren 3an hiru ekitaldi egongo dira: 11.00etan mintzodromoa, 12:00etan Zintzo-Mintzo euskaltzale taldearen aurkezpena eta 12:15ean liburu lanketa taldearen literatura errezitaldia. Ekitaldi hauek Urretxuko udaletxeko atarian izango dira.

Bukatzeko, abenduaren 11n Luzio Gabiriaren omenezko bertso saioa egingo dute Zelai Arizti antzokian. 19:00etan hasiko da.