Gipuzkoako Foru Aldundiak eskola kirolaren kuotak homogeneizatu nahi ditu "epe laburrean", eredua familia guztientzat "bidezkoa eta eskuragarria" izan dadin.
Goizane Álavarez Kultura eta Kirol diputatua Donostia Moda Festival jaialdiaren aurkezpenean izan da, eta EAEko Justizia Auzitegi Nagusiaren aginduari buruz hitz egin du. Agindu horren bidez, 13 urtetik beherakoek Gipuzkoan kirol klub batean izena eman ahal izateko multikiroleko programan parte hartu beharra kentzen da.
Alvarezek gogorarazi du foru erakundeak jada iragarri zuela ez duela errekurrituko epaia betearazteko autoa, eta azaldu du helburua dela Aldundiak lantzen duen Multikirolaren eredu berria behar bezala zehaztuta egotea datorren ikasturtearen hasierarako.
Pixkanaka
Aurreratu duenez, "epe laburrerako" asmoa kuotak homogeneizatzea da; izan ere, jardueraren doakotasuna nahi den agertokia bada ere, "progresiboa" izan beharko du, eta, ziurrenik, datorren ikasturtean ezingo da egia izan, "ekonomikoki bideragarria" ez bada, behintzat.
Foru diputatuak azaldu duenez, "Gipuzkoako Batzar Nagusietan lurraldeko kirol hastapen eredua aztertu eta eztabaidatzeko egingo den ponentziaren aldagaietako bat da".
Adingaberik ez baztertzea
Alvarezek azpimarratu du helburu nagusia dela baliabide ekonomikorik ez izateagatik adingaberik baztertzen ez duen sistema irisgarri bat ezartzea.
Diputatuak espero du datorren ikasturtean Multikirolaren programa "berrikuntza positiboekin" abiatzea, parte-hartze mailari eusteko eta "sistema solidario" bat artikulatzeko.
Talentuagatik eta gaitasun ekonomikoagatik bananduko ez den eta ahulenei arreta emango dien eredu bat defendatu du.
