Aizkorri inguruko mendi ibilbideetan leku enblematikoa izan den Urbiako Fondak ateak zabalik ditu berriro ere, orain hilabete batzuk negozioaren ixtea tristuraz hartu zuten milaka txangozaleen pozgarri. Naiara Romatet eta Peio Bilbao Azkoitiko eta Elgetako bikote gazteak aurrerapausoa eman, eta berriz ireki dute betiko ostatua, ukitu begetarianoa emanda. Irekitzea San Inazio egunarekin batera egin nahi izan dute, eta arrakasta sekulakoa izan da, eguraldi bikaina baliatuz ehunka lagun hurbildu baitira Urbiako zelaietara.
