Eusko Jaurlaritzaren sozietate publikoa den Euskotrenen Burdinbidearen Euskal Museoak amaiera eman dio bere tren historikoetan egindako bidaiei. Hilabete bakar batean 66 zirkulazio egin dira -38 lurrunezko tren eta 28 tren diesela-, eta horietan 3.086 lagun ibili dira. Bertaratze erregistratuak aurreikuspenak gainditu ditu, 2019an baino %4,8 gehiago, urte horretan markatu baitzen instalazioaren historia osoko kopururik handiena.
Euskotrenek zehaztu duenez, zerbitzua erabili duten pertsona guztietatik, 2.140 bidaiatu dute asteburuetan irteten ziren lurrunezko lokomotoretan, eta 946, berriz, lanegunetan zihoazen diesel trakzioetan.
DENBORALDIAREN AMAIERA
Iraila iristean amaitzen da diesel tren horien zirkulazio denboraldia, nahiz eta nahi dutenek lurrun-trenez gozatzen jarraitu ahal izango duten.
Azarora arte, hiru irteera egingo dira asteburuetan, bi larunbatetan (12:00etan eta 17:30ean) eta bat igandeetan (12:00etan). Lurrun-trena, beti bezala, Azpeitiko museoaren eta Lasaoko geltokiaren arteko 4,5 kilometrotan ibiliko da.
Tren historikoetan egiten diren bidaia guztiak egokitu egin dira, Covid-19ren hedapena saihesteko osasun neurriak betetzeko. Hala, edukiera %50era mugatu da gutxieneko segurtasun-distantzia bermatzeko, eta horrek hasiera batean aurreikusitako zirkulazioak bikoiztera behartu du. Gainera, leihoak zabalik egon dira beti, ahalik eta aireztapen handiena ziurtatzeko.
Tren historikoetan bidaiatzeko aukerarekin batera, museoak Europako tren-bildumarik onenetako bat erakutsiko du bere instalazioetan, era guztietako ibilgailuekin: lurrunezko, dieselezko eta elektrizitateko tren-makinak; automotoreak eta hainbat bagoi mota.
Era berean, Euskadiko makina-erremintako multzo osoenetako bat eskaintzen du, Urolako Trenaren lantegi mekaniko zaharraren bidez, eta XIX. mendearen amaieratik trenean erabilitako uniformeen eta munduko tren-erlojuen bildumarik onenetako baten laginak ditu.
