Euskal kooperatibek babesa agertu diote Euskadi 2030 Industria Planari

Eusko Jaurlaritzak eta KONFEKOOPek, Euskadiko Kooperatiben Konfederazioak, topaketa bat egin zuten asteazken honetan Bilbon euskal industria kooperatiba nagusiekin, Mikel Jauregi Industria, Energia Trantsizio eta Jasangarritasun sailburuak azaldutako Euskadi 2030 Industria Plana aurkezteko.

Imanol Pradalesen Gobernuak 3.900 milioi euro bideratuko ditu plan horretara legealdian, eta horrek 12.000 milioi euroko inbertsio pribatua ekarriko du. Guztira, 15.900 milioi euro mobilizatuko dira inbertsio publiko-pribaturako.

“Enplegu egonkor eta ondo ordainduaz ari gara, gure seme-alaben asmoei erantzungo diena eta beren potentziala eta proiektu pertsonal eta profesionalak Euskadin erabat garatzeko aukera emango diena”, nabarmendu zuen Jauregik.

Sailburuak azpimarratu zuen plana ziurgabetasun komertzial eta geopolitiko handieneko une historiko batean aurkezten dela. Testuinguru horretan, dokumentuak “industria gehiagoren eta Europa gehiagoren” aldeko apustua egiten du, Euskadiren etorkizun ekonomikoa eta hurrengo belaunaldien ongizatea bermatzeko.

Sozializazio-prozesua

Topaketa hau Industria Saila gizarte-, ekonomia- eta enpresa-eragileekin sustatzen ari den sozializazio-prozesuaren parte da, plana bere ekarpenekin aberasteko helburuarekin.

Bestalde, KONFEKOOPek koordinatutako Enpresa Kooperatiboen Mahai Industrialeko ordezkariek erronka eta lehentasun nagusiak azaldu zituzten. Horien artean, finantzaketa eskuratzea, bereziki kooperatiba izaerari egokitutako funts publikoetara; kooperatibak sektore helduetan sartzea eta etorkizuneko sektore eta merkatuetara iristeko neurrien beharra, eta finantzaketa eskuratzea, bereziki kooperatiba izaerari egokitutako funts publikoetara, besteak beste.

KONFEKOOPek berretsi zuen subiranotasun industrial estrategikoa funtsezkoa dela enpresa kooperatiboen agendan. Industria kooperatibak, dagoeneko euskal industria BPGren %11 direnak eta nazioartean proiekzio argia dutenak, herrialdeko industria politikaren funtsezko eragile gisa aitortu behar direla defendatu zuen.

Ildo horretan, azpimarratu zuen garrantzitsua dela eredu kooperatiboak onarpen instituzional osoa lortzea, bai araudiaren esparruan, bai politika publikoetan, industria politikari, gizarte kohesioari eta lurralde garapenari egiten dion ekarpenagatik.

KONFEKOOPeko lehendakari Rosa Lavinek Euskadiko Kooperatiben Konfederazioak Euskadi 2030 Planean aurreikusitako Industriaren Euskal Kontseiluan presentzia izatearen garrantzia azpimarratu zuen.