Espainiako Gobernuak %2,7ra igo du 2025erako hazkunde ekonomikoaren aurreikuspena

Espainiako Gobernuak hamarren bat igo du aurtengo hazkunde ekonomikoa, %2,6tik %2,7ra, hirugarren hiruhilekoan Barne Produktu Gordina (BPG) %0,7 handituko dela kalkulatu ondoren.

Ministroen Kontseiluaren osteko prentsaurrekoan Carlos Cuerpo Ekonomia, Merkataritza eta Enpresa ministroak adierazi duenez, "nazioarteko testuinguru konplexua" gorabehera, Espainiako ekonomiak "sendotasun zantzu argiak" ditu oraindik, bai epe ertainean, bai luzean.

"2025. urteko hazkundearekiko aurreikuspenak hobetuz joan dira azken hilabeteetan, aurreko urteetan gertatu den bezala", azpimarratu du Corenok, eta gaineratu du 2025erako %2,7ko aurreikuspen berri hori "zuhurra" dela urtearen itxiera izan litekeenari dagokionez.

Bazkideen "oso gainetik"

Ministroak adierazi duenez, 2025erako %2,7ko eguneratze horrekin eta hurrengo urteetan %2tik gorako hazkunde tasa jarraituekin, Espainiako ekonomia bazkide nagusien "oso gainetik" haziko da.

"Aurten gure bazkide nagusien gainetik bizpahiru aldiz hazten jarraitzea espero da, eta Espainia, 2024ko datuen arabera, munduan gehien hazi zen ekonomia aurreratua izan zen, eta, 2025erako aurreikuspenen arabera, kasu hori izaten jarraitzea espero da. Espainia izango da munduko ekonomia handien artean ere hazkundearen buru", azpimarratu du Cuerpok.

2026rako, Espainiako Gobernuaren hazkundearen aurreikuspena %2,2an mantentzen da; 2027rako eta 2028rako, berriz, aurreikusten du Espainiako ekonomiak %2,1 egingo duela gora bi ekitaldietako bakoitzean.