Eusko Jaurlaritzak 2030erako Enpleguaren Euskal Estrategia eguneratzea onartu du

Eusko Jaurlaritzak 2030erako Enpleguaren Euskal Estrategia eguneratzea onartu du astearte honetan. Estrategia horretan, "kalitatezko enpleguarekin eta kohesio sozialarekin" duen konpromisoa indartzeko neurriak jasotzen dira.

Ekonomia, Lan eta Enplegu Sailak ohar batean jakinarazi duenez, dokumentu hori "ezinbesteko ibilbide-orria" da lan-merkatu "erresilienteagoa, dinamikoagoa eta datozen urteetako erronketara egokituagoa" sendotzeko.

Bertsio berri horrek aitortzen du enplegu-politika aktiboetarako sarbidea herritarren eskubide subjektiboa dela, eta erakundeen arteko lankidetzan eta Lanbideren, aldundien eta toki-erakundeen arteko koordinazioan oinarritutako gobernantza-eredu bat bultzatzearen aldeko apustua egiten du, Enpleguaren Euskal Sarearen bidez.

Gizarte-, ekonomia- eta erakunde-eragileek parte hartu duten partaidetza-prozesu baten emaitza da, Euskadiko Elkarrizketa Sozialerako Mahaiaren eta Enplegu Politika Publikoen Euskal Kontseiluaren azken balioespena jaso duena.

Lehentasun hauek ezartzen ditu: enpleguaren kalitatea eta egonkortasuna handitzea; aukera berdintasuna bultzatzea eta genero arrakala murriztea; pertsonen enplegagarritasuna indartzea etengabeko prestakuntzaren eta birkualifikazioaren bidez; digitalizaziotik, energia trantsiziotik eta belaunaldi errelebotik eratorritako ekoizpen eraldaketa prozesuak laguntzea; eta kolektibo ahulenen gizarteratzea eta laneratzea hobetzea.

Ekonomia berdea eta zirkularra sustatzeko, industria digitala indartzeko, zainketetan enplegua duintzeko eta laneko bitartekotza- eta orientazio-zerbitzuak modernizatzeko jarduerak biltzen ditu. Halaber, gorabidean dauden sektoreetan proiektuak abiaraztea aurreikusten du, enplegu jasangarria eta lan-merkatuaren eskaera berrietara egokitua sustatzeko.