Eroski Taldeak 46,8 milioi euroko emaitza positiboarekin itxi du 2022ko lehen seihilekoa, “zor gutxiago izatearen ondorioz finantza-kostuak murrizteak neurri handi batean bultzatutako irabazia”.
Eroskik atzo jakinarazi zuenez, 2.633 milioi euroko negozio-zifra lortu du taldeak, eta 4 puntuko hazkundea izan du salmentak 10 puntu baino gehiagoko inflazio-testuinguruan, “aurrezkia kontsumitzaileei helarazteko” sustapen-ahaleginari esker. “Prezioen igoerari eusteak eta sustapen-jarduera handitzeak, deskontuen eta eskaintzen bidez”, 183,6 milioi “familiei egindako aurrezkia” ekarri du taldeak urtearen lehen erdian.
“Ahalegin horri esker, elektrizitatea, garraioa edo alokairuak bezalako partidetan gastuak gehitzearekin batera, eragiketa-irabazi arrunta %11 murriztu da, eta seihileko horretan 94,3 milioi eurora iritsi da. Eroskik nabarmendu zuen bere marjinak jaitsi dituela “kostuen hazkunde handia kontsumitzaileengan ez eragiteko”.
Urteko lehen zatian, taldeak 39,5 milioi inbertitu ditu 60 supermerkatu birmoldatzeko eta 37 denda berri, 7 supermerkatu propio eta 30 establezimendu frankiziatu irekitzeko; 355 lanpostu berri sortu dituzte. Gainera, zorra 16 milioi murriztu du.
