Artikutzan San Agustin patroiaren eguna ospatuko dute asteazkenean

Nafarroan kokatuta egon arren Donostiako Udalarena den Artikutzako lursailean San Agustin zaindariaren eguna ospatuko dute asteazken honetan. Ohikoa denez, hainbat ekitaldi antolatu dituzte egun osorako.

Donostiako Udaletik jakinarazi dutenez, 11:30ean pilota partidak hasiko dira eta arratsaldeko bostetan herri kirolen erakustaldia. Ondoren, 20:00etan dantzaldia izango da.

Horiez gain, egunean zehar artisautza produktuen erakusketa eta salmenta postuak ere egongo dira, baita bi txosna ere, jaiaz gozatzera hurbiltzen diren guztiak janariz eta edariz bapo hornitzeko.

Sarbide hobeago bat

Iturri berberek adierazi dutenez, eremurako sarbidea hobetu egin dute hainbat esku-hartzeren ondoren, besteak beste, "herrixkara sartzeko errepideko bihurgune batzuetan babes-hesiak jartzea", "seinale bertikalak hobetzea eta plaka islatzaileak jartzea" ere erabaki dute “eroankortasuna seguruagoa izan dadin, batez ere ikusmen eskaseko egunetan eta gauez".

Halaber, Udalak aurreratu duenez, aurtengo urtea amaitu aurretik "hobetu egingo da atetik herrixkara jaisten den errepidearen lur zorua". Lursailaren mugak identifikatzen dituzten informazio-seinaleak ere jarri dituzte, eta Beltzuntzako lepora iristen den bost kilometro inguruko pista konponduta dago.

Lursail horretan, duela urte batzuetatik hona, ingurumen hezkuntza eta dibulgazio programa bat garatzen da 'Artikutza Natura' izenpean; eskolak etortzen dira eta ikasleentzako bisita gidatuak eskaintzen dituzte. 2023an zehar, 420 ikaslek hartu zuten parte 18 taldetan banatuta.

"Artikutzaren balio naturalak ezagutaraztea da helburu nagusia. Horretarako, lursaila zeharkatzen duten bidezidorrak zeharkatzen ditugu, naturarekiko kontaktu zuzena ahalbidetuz, ingurumena eta gure ondare naturala kontserbatzeko premiazkoa den kontzientziazioan azpimarra jarriz", adierazi du Juantxo Marrero Donostiako Ekologia zinegotziak. Jarraian nabarmendu duenez, "horretarako, egiten diren bisita eta jarduera guztiak modu kontrolatuan egiten ditugu, ingurune naturalean kalterik eragitea saihesteko".

Gogora ekarri du, joan den urteko igandeetan bisita gidatuak eskaini zituztela lursailean zehar, luzera eta zailtasun desberdineko ibilbideak aukeran jarrita. 2023an, 18 bisita jaso zituzten, guztira, jarduera horretan 265 pertsonak parte hartu zutelarik.

Muturluzearen zaintza

Artikutzan garatzen ari den beste egitasmoetako bat, muturluzearen etengabeko jarraipena da. Espezie hori galtzeko arriskuan dago, populazioa izugarri gutxitu baita iberiar penintsulan.

"Uretako ohiturak dituen ugaztun horren populazio egonkorra dugu Artikutzan, eta espeziearen, bere ohituren eta mugimenduen jarraipen zehatza egiten ari gara, isolatuta dagoenez etorkizuna zalantzan duelako", azaldu du Marrerok.

Bestalde, Artikutzako aterpetxea astebururo eta oporraldietan okupatuta egoten dela adierazi du. 2023an, 10 eta 32 pertsona arteko 73 taldek erabili omen zuten.