Donostiako suhiltzaileek 396 desinfektatze-zerbitzu egin dituzte koarentenan

DONOSTIA. Donostiako Suhiltzaile Zerbitzuak 396 desinfekzio zerbitzu egin ditu COVID-19 delakoaren koarentenan. Martxoaren 23az geroztik, suhiltzaileek 27 adinekoen egoitzen desinfekzioeran parte hartu dute. Hasieran, eremu komunak desinfektatzen eta, ondoren, egoitza bakoitzera hamar joan-etorri egin dituzte aldizka.

Eneko Goia alkateak adierazi duenez, adinekoen egoitzez gain, "Udalaren Suhiltzaile Zerbitzuak mendekotasuna edo ezgaitasuna duten pertsonen 11 zentroz, gizartetik bazterturik dauden pertsonak dituzten 9 aterpetxez edo zentroz, 9 ekipamendu publikoz, hala nola autobus-geltokia eta azokak, eta udalaren hainbat egoitzaz arduratu da".

Pandemiaren aldi kritikoenean, apirileko bigarren hamabostaldian, zerbitzuak 40 interbentzio prebentibo baino gehiago egiten zituen astean; une honetan, berriz, kopurua 6 interbentziora murriztu da astean, egoitzetako osasun-egoeraren bilakaera onak nabarmen murriztu baitu haien maiztasuna.

Aparteko lan horiei erantzun ahal izateko, Suhiltzaileen Zerbitzuak bere antolamendua egokitu behar izan du apirilean eta maiatzean, lan-ordutegiak aldatuz eta segurtasun-protokolo berriak ezarriz. Ekainean, berriz, ohiko egitura berreskuratu du, "baina erne dago egoerak atzera egiten badu", Goiak adierazi duenez.

Talde-lana egoitzetan Suhiltzaileen udal zerbitzuak adinekoen egoitzetan egin duen lana Gipuzkoako Foru Aldundiko suhiltzaileekin, DYArekin eta Gurutze Gorriarekin batera egin da, Aldundiko Gizarte Politikako Departamentuaren ekimenean parte hartuz.