Urte batzuk badira Korrikarik ez dagoen urtean Egia Euskaraz eguna antolatzen dutela auzoan eta aurten beste pauso bat ematea erabaki zuten eta esperientzia berri bat martxan jartzea, Bilbon Lutxo Egiak egin zuen performancetik abiatuta: euskara hutsez bizitzea zer den jakin nahi zuen idazleak.
Egiatarrek hori bera egingo dute, baina taldean. Hala, auzoko 20 elkartek eta norbanako askok parte hartuko dute Euskaraz bizi nahi dugulako esperientzian. Astez aste bi edo hiru taldek garatuko dute proiektua: bizitza normala egingo dute aste osoan zehar, baina euskara hutsez. Dendetara joango dira, kirola egitera lagunekin, seme-alabekin parkera, tabernetara, lanera, anbulategira... Eta inguru guztietan euskaraz aritzen saiatuko dira. Talde batek besteari lekuko moduan pasako dion liburu batean jasoko dute leku batean eta bestean bizitakoa eta, gainera, parte-hartzaile bakoitzak koaderno bat ere izango du bere esperientziari buruzkoak idazteko. Astero bideo bat ere osatuko du elkarte bakoitzak (mugikorrarekin grabatuta) eta martxoaren hasieran, esperientzia amaitzean, grabaketa guztiak elkartu eta bideo bat osatuko dute.
Ekimena atzo abiatu zuten, baina asteak daramatzate lanean egiatarrek guztia prestatzen eta abenduan egindako bilera batean Telp ikastaroa ere egin zuten parte-hartzaileek, euskaraz bizi nahi dutenek egoera desberdinetan nola joka dezaketen aztertzeko. Oinarrietako bat, esaterako, lehen hitza beti euskaraz egitea da. Beste pertsonak euskara ulertu baina hitz egiteko gai ez denean zer egin aztertu zuten, solaskideak gaztelaniaz egiteko eskatzen duenean nola jokatu... Eguneroko bizi-tzan hainbatetan gertatzen diren esperientzia horietatik ikastea da ekimenaren helburua, besteak beste, Alberto Irazu ekimenaren bultza-tzaileetako batek adierazi duen moduan.
Lehen pausoak, dantzan
Atzo abiatu zuten prozesua eta Trebeska dantza taldekoek eta Egia Bizirik auzo elkarteak jaso zuten lekuko izango den liburua plaza Haundin (Martin Santos) egindako ekitaldian. Proiektuaren aurkezpen publikoa ere izan zen eta parte hartuko duten guztiak bildu ziren bertan, baita beste auzotarrak ere.
Esperientzia bi hilabete hauetatik haratago joatea nahi dute eta horretarako “arrastoa” utzi behar zutela pentsatu zuten: horregatik erabaki zuten liburuan eta bideoan jasotzea egiatarren bizipenak. Beste auzo edo herriren batean antzeko esperien-tzia abiatu nahi badute baliagarria izan daitekeela uste du Irazuk. Gainera, bildutako materialarekin erakusketa bat antolatzea ere aurreikusten dute egiatarrek urte bukaerarako.
Urtarrilaren 8tik martxoaren 12ra arte. Astero bi edo hiru taldek edukiko dute lekukoa izango den liburua eta martxoaren 12an antolatuko duten Egia Euskaraz egunean esperientziak konpartitu eta balorazioa egingo dute.
Parte-hartzaileak. Egia Bizirik auzo elkartea, Trebeska dantza taldea, Porrontxoak, Antxeta Ttan Ttakun elkartea, eskubaloi taldea, haurgunea, Sudur taldea, haurtxokoa, gaztelekua, Txondorra elkartea, Haitzarte mendi taldea, Lauaizeta, Sibilia, Urzaleak elkartea, Tabakalera, musika eskola, Sortu, Aitor ikastola, Latxaga, Maria Reina ikastetxea eta norbanakoak.
Dendak. Merkatarien ahalegina eskertzearren, Egiako dendetan euskaraz gida kaleratu dute.
