balonmano

Aizkora | Mikel Larrañaga, Gipuzkoako Txapelketaren garaile

15.11.2021 | 00:57
Mikel Larrañaga, beste txapelketa batean. Argazkia: Iker Azurmendi

donostia – Ederki asko erakutsi du Mikel Larrañaga azpeitiarrak sasoi betean dagoela, Euskal Herriko aizkolaririk onena zein den erabakitzeko igande honetan Bilbon jokatuko den Aizkolari Txapelketa Nagusiko finalean Iker Vicenteri aurre egiteko. Izan ere, Gipuzkoako txapela eskuratzeaz gain, Larrañagak Euskal Herriko txapelketako kanporaketan denborarik onena egin baitzuen, eta aurreko abuztuan Donostiako Urrezko Kopa irabazi.

Txapeldunak ez zien inolako aukerarik eskaini aurkariei. Lau kanaerdiko, 60 hazbeteko lau enbor eta bi oinbiko 29 minutu eta 37 segundoan ebaki zituen Larrañagak, eta bigarren sailkatu zen Eneko Otañok 54 segundo gehiago behar izan zituen. Podiuma osatu zuen Julen Alberdik 34 minutu eta 16 segundotan gelditu zuen kronometroa. Aizkolari Txapelketa Nagusiko kanporaketan bezalaxe, 2019an Gipuzkoako tituluaren aurreko irabazlea izandako azkoitiarraren denbora hobetzea lortu zuen Beizamakoak.

Larrañaga, Otaño eta Alberdi Bilbon izango dira datorren igandeko finalean, Jon Irazu, Aitzol Atutxa eta Iker Vicenterekin batera.

Ugaitz Mugerzak (35:13), Iñaki Azurmendik (36:17) eta Jesus Mari Mujikak (39:36) osatu zuten Gipuzkoako txapelketaren sailkapena.

Mikel Larrañagak dituen hiru txapelak edota Azurmendiren seiak urrun daude oraindik, Joxe Mari Olasagastik lehiaketa honetan lortutako hamahiru txapelen markatik.

Larunbat honetan bertan Gipuzkoako beste titulu bat jokatuko da, kasu horretan harri jasotze modalitatean.

noticias de noticiasdegipuzkoa