Petrolio-eskari globalaren aurtengo eta datorren urteko aurreikuspenak pixka bat beherantz berrikusi ditu Energiaren Nazioarteko Agentziak (AIE) LPEE baino ezkorrago agertuz.
Petrolioaren merkatuari buruz hilero ateratzen duen txostenean, 2022an batez beste egunero 99,2 milioi upel kontsumituko direla kalkulatu du AIEk, hau da, 2021ean baino %1,8 gehiago eta ekainean aurreratutakoa baino hamarren bat gutxiago.
ELGEko hiru eskualde handietan (Europa, Ipar Amerika eta Asia-Pazifikoa) kontsumoa espero baino txikiagoa dela erakusten duten azken datuak ikusita egin dute zuzenketa hori txostengileek.
Bere azterketaren arabera, prezio altuen eragina nabarmentzen ari da, eta apirilean Ekonomia Lankidetza eta Garapenerako Antolakundeko (ELGA) herrialde nagusietan beherakada antzematen da.
Eta hori guztia, gorabidean dauden beste herrialde batzuetan maiatzean gorakada izan arren, bereziki Txinan, aurreko hilabeteetan covid-aren ondorioz itxita egon ondoren.
Ez da nahikoa, ordea, joera orokorra iraultzeko. 2023ari begira, Nazioarteko Diru Funtsak (NDF) dagoeneko baztertzen ez duen atzeraldi posible baten mehatxupean, aurreikuspenak AIEk berak maia-tzean aurreratutakoak baino txikiagoak dira, petrolio eskaera %2,2ra mugatuko omen delarik, eguneko 101,3 milioi upelera.
proiekzio txikiagoak
LPEErenak baino proiekzio nabarmen txikiagoak dira horiek, asteartean argitaratutako hileko txostenean 2022an %3,47ko igoera iragarri baitzuen, eguneko 100,29 milioi upel, eta 2023an %2,7koa 103 milioi upelera iritsiz.
Eskariari dagokionean, harrigarria bada ere, mendebaldeko herrialdeek energia sektorean Moskuri jarritako zigorrekin lortu nahi duten helburuaren erabat kontra, petrolio gordinaren esportazio errusiarrak ondo eusten ari dira eta, batez ere, haien diru-sarrerak nabarmen hazten.
Zehazki, Errusiako esportazioak 250.000 upel bakarrik murriztu ziren ekainean, eguneko 7,4 milioi upelekoa izanik. Eta bereziki Ukrainaren inbasioa hasi zenetik petrolio upelaren prezioa nabarmen garestitu denez, euren hilabeteko diru-sarrerak 700 milioi dolarretan igo ziren 20.400 milioiraino. Aurreko urtearekin alderatuz gero, %40ko igoera erakusten du horrek.
Errusiak zigorren aurrean demostratu duen erresistentzia harrigarria lagun, mundu osoko petrolio ponpaketa 690.000 upeletan igo da ekainean 99,5 milioira iritsi arte, eta, horri esker, AIEk gorantz berrikusi ditu aurtengo petrolio eskaintzari buruzko aurrerapenak; orain onartzen dutenez 100,1 milioikoa izango baita aurten batez beste, 2023an 101,1 milioiko errekorra lortzeko asmoz.
Ekaina eta abendua bitartean, eguneko 1,8 milioi upel gehiago aterako direla uste da; horietatik 380.000 soilik etorriko dira Errusia buru duen LPEE+ karteletik. Beraz, gainerako ekoizleek 1,4 milioi upel gehiago jarri beharko dituzte egunean, batez ere Estatu Batuek.
