Gaur hasiko da Euskadi Bono Dendaren fase berria

Pertsona bakoitzak bost bonu eskura ditzake eta 10 euroko beherapena egingo zaie 30 euro baino gehiagoko erosketetan

10.01.2022 | 23:58
Beherapenak iragartzen dituen kartel bat. Argazkia: Javi Colmenero

donostia – Eusko Jaurlaritzako Turismo, Merkataritza eta Kon-tsumo Sailak abian jarri du Euskadi Bono Dendaren bigarren fasea, erosketak sustatzeko asmoz. 2,5 milioi euroko hornidura du fase berriak eta hamar euroko deskontuak egingo dira 30 euroko erosketa bakoitzeko. Gaurtik martxoaren 31ra arte, erabiltzaile bakoitzari dagozkion bost bonuak trukatu ahal izango dituzte bezeroek, abenduaren 5ean amaitu zen lehen fasean egin ez bazuten.

Aurreko fasean 400.000 bonu baino gehiago kontsumitu ziren, eta bigarren fase honetan 258.000 deskontu-bonu izango dira hurbileko merkataritzan kontsumoa sustatzeko, Javier Hurtadok zuzen-tzen duen Sailak jakinarazi duenez.

Euskadi Bono Dendak bere ezaugarriei eusten die, 30 eurotik gorako erosketetan hamar euroko deskontua eginez, eta zuzenean merkataritza-establezimenduan trukatu behar dira bonoak. 16 urtetik gorako pertsona bakoitzak bost bonu izango ditu eta lehen fasean erabili ez baditu, orain erabili ahal izango ditu.

4.300 establezimenduk baino gehiagok egin dute bat ekimenarekin. Hurbileko saltokiak eta hiriko merkataritza-jarduerarekin lotutako zerbitzuak dira, hala nola ile-apaindegiak eta edertasun-institutuak, garbitegiak, tindategiak, argazki eta fotokopia-zerbitzuak, markatze-zerbitzuak eta konponketa-establezimenduak.

anteriorsiguiente
noticias de noticiasdegipuzkoa