Euskara indartzeko laborategia abiarazi dute elkarlanean

Hainbat erakundek eta euskalgintzak garatutako Badalab zentroa aitzindaria izango da

22.07.2021 | 00:38
Erakundeetako eta euskalgintzako ordezkariak Badalab laborategiaren aurkezpenean, atzo Donostian.

donostia – Euskararentzat aukera berriak identifikatu eta horietan eragiteko asmoz sortu dute Badalab Hizkuntza eta Gizarte Berrikuntzarako Laborategia Gipuzkoako Foru Aldundiko Etorkizuna Eraikiz egitasmoaren baitan. Errenteriako Torrekua eraikinean izango du behin-behineko egoitza eta hizkuntza gutxituak biziberritzeko lanean diharduten guztientzat erreferentzia gune bilakatzea du xede.

Jomuga horrekin abiarazi zuten atzo proiektu berri hau, Markel Olano diputatu nagusia bertan zela, euskal erakundeetako eta euskalgintzako hainbat ordezkarik Foru Aldundian antolatutako sinadura ekitaldian, izan ere, bertan osatu baitzuten zentro honek oinarrian izango duen par-tzuergoa.

Etorkizuna Eraikizen egitasmoaren baitan garatuko den zortzigarren proiektu estrategiko honek euskararen biziberritze prozesuan berrikun-tza eta esperimentazioaren aldagaiak txertatzea izango du helburu, eta aldi berean, gizarte berrikuntza prozesuetan hizkuntzaren aldagaia kokatzea. Ildo horretan, euskararentzat aukera berriak identifikatu eta horietan eragiten saiatuko da, prototipo berriak sortuz. Gainera, hizkuntza teknologiarekin esperimentatzea ere izango du jomugan.

Helburu horietatik abiatuz, Badalabek hiru emaitza nagusi lortu nahi ditu bere jardunarekin. Alde batetik, euskara indartuko duen ekosistema eraberritu eta aberatsagoa lortzea, eragile berri eta anitzen partaidetzarekin, etengabe sortzen diren testuinguru berrietan euskara presente egon dadin eta eremu horietan bere erabilera areagotu dadin. Bigarrenik, prototipo eta gizarte proposamen "ausartak" gauzatzea, bide berriak zabalduko dituzten proiektu eta ekimen berritzaileak euskaraz abiarazteko. Eta azkenik, narratiba berriak eta euskarazko "bizipen zirraragarriak" sorraraztea, formatu eta testuinguru anitz eta digitalean.

aitzindaria nazioartean Badalabek hasieratik garatuko du Euskal Herriko mugez haratago erreferen-tzia bilakatzeko bokazioa, egitasmo aitzindaria izango baita nazioartean.

"Esperimentaziorako baliabideak eta testuinguruak sortu behar ditugu elkarlanean, horrela bakarrik lortuko baitugu erronka horiei modu arrakastatsuan erantzun eta euskararen etorkizuna bermatzea. Garai berriek tresna, proiektu eta baliabide berriak eskatzen dituzte, eta ahalegin horretan akuilu lana egitera dator Badalab", azaldu zuen Olanok.

PARTZUERGOA

Kideak. Gipuzkoako diputatu nagusia, Markel Olano; Eusko Jaurlaritzako Kultura eta Hizkuntza politikako sailburua, Bingen Zupiria; Errenteriako alkatea, Aizpea Otaegi; Kontseiluako idazkari nagusia, Paul Bilbao; Soziolinguistika Klusterreko zuzendari nagusia, Imanol Larrea; EITBko zuzendari nagusia, Andoni Aldekoa; UPV/EHUko errektorea, Eva Ferreira; ArantzazuLABeko zuzendari nagusia, Naiara Goia; Languneko zuzendari nagusia, Lohitzune Txarola; eta Euskaltzaindiako presidentea, Andres Urrutia.

"Tresna eta baliabide berriak sortzeko ahalegin horretan akuilu lana egitera dator Badalab"

markel olano

Gipuzkoako diputatu nagusia

anteriorsiguiente


noticias de noticiasdegipuzkoa