Deustuko Unibertsitateak Larramendi eraikina ireki du

Donostiako kanpuseko eraikin berrienak "eraberritzea, ikerkuntza eta integrazioa" uztartuko ditu

06.07.2021 | 01:13
Agintariak atzo Larramendi eraikinaren aurrealdean.

donostia – Deustuko Unibertsitateak Larramendi eraikina inauguratu zuen atzo, Donostiako kanpuseko gehikuntza berriena. 12.000m2 hauek eraldaketa "kuantitatibo eta kualitatiboa" suposatuko dute, unibertsitateko arduradunen esanetan.

Bisita gidatu baten bidez, instalakuntzen aurkezpen eta azalpena jasotzeko aukera izan zuten bertaratu ziren agintariek. Hantxe izan ziren Markel Olano, Gipuzkoako diputatu nagusia; Eneko Goia, Donostiako alkatea; Bakartxo Tejeria, Eusko Legebiltzarreko lehendakaria; Ignacio Subijana, EAEko Justizia Auzitegi Nagusiko presidentea; Jose Ignacio Munilla, Donostiako gotzaina eta Jose Maria Guibert, Deustuko Unibertsitateko errektorea, besteak beste.

Larramendi eraikinaren ekarpenek bi ardatz nagusi dituzte. Alde batetik, titulazio berriak irakasteko espazioak ditu bere barne. Are gehiago, irakaskuntza espezifikoetarako gune espezializatuak ere badaude; horren adierazgarri dira Fisioterapia graduko ikasleentzako anatomia laborategi interaktibo bat, Jarduera Fisikoaren eta Kirolaren Zientzietako ikasleentzako gimnasioa edota gorputz-espresioa lantzeko tatamia. Ane Arbillaga, Fisioterapiako Dekanordeak "eraberritzea, ikerkuntza eta integrazioa uztartzeko aukera" izan dutela isladatu zuen, "zerotik" diseinatu ahal izan duten solariuan.

Bestalde, Ikasteko eta Ikertzeko Baliabideen Zentroa (IIBZ) dago bertan. Liburutegi tradizional bat baino, "harremanak sortzeko" gune bat da, Ixone Galarraga, IIBZko arduradunaren esanetan. Euskarri digitalak kontutan hartu dituzte ikasleek beharko dituzten edukiak izateko, baina espazio eta baliabide fisikoak ere ezarri dituzte. Formakuntza gela, irakurtzeko aretoa, sarrera libreko bilduma jasotzen dituzten bi gela eta ikasteko postuak dituen aretoa ere badaude. Eraikinaren izenari keinu eginez, Manuel Larramendi jesuita, filologo eta historialariaren bost libururen lehen edizioak ere baditu ikusgai.

Goiak Deustuko Unibertsitateak Donostiako hiriari "ekarpenak egiten" jarraitzea "pozgarria" dela adierazi zuen, bisita gidatuari jarraiki izan zen inaugurazio ekitaldian. "Ekarpen berri bat, ekarpen historia luze batean", isladatu zuen lez.

Olanok Larramendiren irudiaren aldarrikapena egin nahi izan zuen ekitaldi berdinean. "Gaurko Gipuzkoa eta gaurko Euskal Herria ezin lirateke ulertu Aita Larramendi gabe".

Larramendi eraikinak Iker Arana du egile, eta "hiriaren skylinea alda-tzen" duela isladatu nahi izan zuen Xabier Riezuk, Donostiako kanpuseko errektoreordeak, "batez ere", Urumearen ardatzaren inguruan, "alkatetzak hiriak datorren urtetarako duen proiektu garrantzitsuetako bat bezala aipatu izan" duenaren inguruan.

IBZn Aita Larramendiren bost libururen lehen edizioak daude ikusgai, eraikinari izena ematen dion historialariari keinu eginez

Laborategi interaktibo bat, gimnasioa eta gorputz espresioa lantzeko aukera emango duen espazio bat ere izango ditu bere barne

anteriorsiguiente


noticias de noticiasdegipuzkoa