Coronavirus | Curevac-en txertoa probatzeko ikerketan parte hartzeko hautatua izan da BioDonostia

2.000 euskaldun inguruk parte hartuko dute saiakuntza klinikoan

21.01.2021 | 00:57
Biodonostia laborategietako egoitza. Argazkia: Ainara Garcia

donostia – Osakidetzaren Biodonostia eta Biocruces Bizkaia osasun-ikerketako institutuak  aukeratu dituzte Curevac Alemaniako botika-industriaren COVID-19arentzako txertoaren eraginkortasuna eta segurtasuna frogatuko duen entsegu klinikoan parte hartzeko. Mundu osoko 30.000 pertsonek parte hartuko dute saiakera kliniko honetan , eta horietatik 2.000 euskaldunak izan daitezke. Bi dosi jasoko dituzte 28 eguneko tartean, Eusko Jaurlaritzako Osasun Sailak ohar baten bidez jakinarazi duenez.

Curevac-ek immunitate-sistema estimulatzen duen RNA mezulariaren mekanismoan oinarritutako txertoa garatu du; alegia, gaur egun Pfizer eta Moderna txertoek erabiltzen duten funts berekoa.

Inolaz ere, Curevac-en txertoa mantentzeko eta prestatzeko baldintzek "erraztu egiten dute banaketaren logistika", orain arte hori izan baita "oztopo nagusietako bat". Gainera, Europan ekoiztuko denez, kontinente horretan banatzeko dosi gehien konprometitu dituen txertoetako bat da.

Azterlanaren protokoloan adierazitako irizpideak betetzen dituzten 18 urtetik gorako euskaldunek parte hartu ahal izango dute azterlanean, oraindik argitaratu ez badira ere.

Hautatutako pertsonak modu ausazkoan banatuko dira txertoa jasotzen duen taldean edota inolako eraginik gabeko plazebo bat jaso-tzen duen kontrol-taldean. Entsegurako bi dosi inokulatu behar dira, 28 eguneko tartearekin.

Parte-hartzaileek urtebetera arteko jarraipena izango dute mediku-bisita eta telefono-deien bitartez, eta, mugikorrerako aplikazio bat ere emango zaie informazioa erregistratzeko. Boluntario horiek edozein unetan izango dute egitasmoa uzteko ahalmena, eta txertoa ala plazeboa jaso zuten jakin ahal izango dute.

sei hilabete Txertoa eman eta hiru eta sei hilabetera, tarteko analisiak egingo zaizkie, eta, emaitzen arabera, txertoaren erabileraren onarpena bizkortu egin ahal izango da, merkaturatutako batzuekin gertatu bezala.

Datozen egunetan, ezinbesteko dokumentazio eta eskakizun guztiak eskura dituztenean jarriko dituzte martxan Biodonostiak eta Biocruces Bizkaiak parte-hartzaileak biltzeko prozesuak.

Bi ikerketa-institutu horiek izan dira, Madrilgo zentro batekin batera, ikerketa honetan parte hartzeko Espainian hautatu dituzten bakarrak, eta horrek "gure osasun-sistemaren gaitasuna islatzen du, bai asistentziazkoa, bai ikerketakoa", nabarmendu dute Osasun Sailetik.