Donostiak hiru plaka jarriko ditu ETAk 1986ko urriaren 25ean Donostian hil zituen Rafael Garrido Gipuzkoako gobernadore militarra, Daniela Velasco emaztea eta Daniel, euren semeetako bat, omentzeko.
Eneko Goia alkateak astearte honetan prentsaurrekoan iragarri duenez, haien oroimenezko plakak jartzea, aurrekoetan bezala, omenaldi "xume" batean egingo da datorren larunbat eguerdian, Boulevard etorbidean, eta bertan izango dira udal talde politikoetako hainbat zinegotzi.
Orduan 59 urte zituen eta berez Zaragozan jaiotakoa zen Rafael Garrido Gil brigadako jenerala, duela 35 urte hil zuen ETAk, semaforo gorri batean geldirik zegoela, motoan zihoazen bi terroristek bere auto ofizialean lapa-bonba bat jarrita, Boulevard eta Legazpi kaleen arteko elkargunean.
Atentatuan gobernadorea, 53 urteko emaztea, eta senar-emazteen seigarren eta azken semea, 21 urtekoa, hil ziren; gidaria eta beste hamar bat lagun zaurituta geratu ziren.
Tartean María José Teixeira zegoen, 27 urteko oinezkoa, eta handik egun batzuetara atentatuak eragindako lesio larrien ondorioz zendu zena, atentatuaren laugarren biktima bihurtuz.
Goiak azaldu duenez, udal arduradunek beti egin ohi duten legez, Teixeiraren senideekin harremanetan jarri zirenean, "eskertu" egin omen dute keinua, baina "uko egin diote".
Hiru oroigarri berri horiekin, Donostiako Udalak jarraipena eman nahi dio aurreko legealdian abian jarri zuen ekimenari: alegia, "Hirian bizia galdu zuten motibazio politikoko biktimen oroimena berreskuratu eta espazio publikoan ikusaraztea", hil ziren leku berberetan.
Orain arte, ETAren biktimen omenezko plakak daude: Juan Maria Araluce, Jose Maria Elisegui, Antonio Palomo Perez, Luis Francisco Sanz Flores, Alfredo Garcia Gonzalez, Gregorio Ordoñez, Francisco Martin Gonzalez, Fernando Garcia Mugika eta Juan Manuel Garcia Cordero.
