Irudikak eta Plaiaundik ONkologia 360º proiektuarekin jarraituko dute minbizia duten pertsonekin ikasturte berri honetan

CIFP Irudika LHII eta CIFP Plaiaundi LHII zentroek jarraipena emango diote gizarte-, osasun- eta hezkuntza-proiektuari ONkologia 360º minbizia duten pertsonekin 2025-2026 ikasturtean. Fase berri honetan, ikasleei, minbizia duten pertsonei eta haien familiei zuzendutako prestakuntza-, laguntza- eta sentsibilizazio-ekintzak zabaltzea aurreikusten da, zentroen, profesionalen eta osasunaren arloko erakundeen arteko lankidetza sendotuz.

'ONkologia 360º'

Ekimen horren baitan, hilaren 16an, 'ONkologia 360º' dokumentala estreinatuko da arratsaldeko seietan Zarauzko Modelo aretoan. Ikus-entzunezko pieza horrek 2024-2025 ikasturtean garatutako hezkuntza, osasun eta gizarte proiektu "aitzindari" honen funtsa jasotzen du.

ONkologia 360º Eusko Jaurlaritzako Lanbide Heziketako Sailburuordetzak bultzatutako ekimena da, eta LHko lau ikastetxeren lana batu du: CIFP Irudika LHII, CIFP Plaiaundi LHII, Inmakulada Tolosako Lanbide Ikastola eta Andoaingo Zinema eta Bideo Eskola (ESCIVI).

Lankidetza berria

Helburua izan da "paziente onkologikoen beharrei erantzun integrala ematea, irudi pertsonala, nutrizioa, ariketa terapeutikoa eta ongizate emozionala modu koordinatuan jorratuz", sustatzaileek azaldu dutenez, eta nabarmendu dute "Lanbide Heziketaren, Osakidetzaren eta pazienteen elkarteen arteko lankidetza berria" dela.

Proiektuak Osakidetzaren inplikazio zuzena izan du, eta Gipuzkoako gaixo eta senideen elkarte nagusien laguntza izan du: Asgicer, Katxalin, Minbiziaren Aurka Gipuzkoa, Iñurri, Aspanogi eta Agadelprise.

Tailerrak

Joan den ikasturtean, jardunaldi zientifikoak, aholkularitza-tailerrak eta esperientzia partekatuak egin dira ikasleen, profesional sanitarioen eta pazienteen artean. Horietan, Lanbide Heziketak eragin sozial handiko eremuetan duen ahalmen eraldatzailea erakutsi du.