Euskararen erabilera sustatzeko partaidetza aktibora deitu ditu herritarrak Euskaraldiak

Maiatzaren 15etik 25era ospatuko den Euskaraldia hasteko bi aste besterik ez falta direnean, Euskal Herriko ehunka herri euskararen erabileraren aldeko ekimen hau hartzeko prestatzen ari dira. Izena emateko fasea martxan dela, tokiko batzordeek areagotu egiten dituzte erakundeetara bisitak eta ekitaldien antolaketa, parte-hartzaileen artean ilusioa eta "urduritasun" positiboa kutsatuz.

Txapa: sinboloa eta erreminta

Ostiral honetan Lekeitioko plazan egindako ekitaldi batean, hasiera eman zaio identifikazio txapen banaketari, ahobizi edo belarriprest gisa parte hartuko dutenak bereizten dituen ekimenaren ikurra. Aurkezpenean Lekeitioko eta Mutrikuko batzordeetako ordezkariak, Euskaraldiko koordinazio orokorreko kideak eta euskal gizarteko pertsona ezagunak izan dira.

"Euskaraldia arrakastatsua izan dadin, tokiko batzordeak ezinbestekoak dira. Horiek egiten dute posible mezua herritarrengana iristea eta ariketa lurralde osoan egin ahal izatea, herriz herri", azpimarratu du Jon Kobeaga Lekeitioko koordinazio orokorreko eta batzordeko kideak. Gainera, Kobeagak azpimarratu nahi izan du aurten bereziki "indartsu" sumatu dituela batzordeak: "Duela bi urteko edizioan oraindik nabaritzen zen lehen bizi genuen pandemiaren eragina. Hala ere, aurten ziur dakigu jende gehiagok parte hartu duela batzordeetan, herri ugaritatik hala helarazi digutelako".

Joseba Palenzuela Mutrikuko batzordeko kideak bere herrian Euskaraldiaren inguruan sortzen ari den mugimendua azpimarratu du: "Herri mailan oso mugimendu polita sortzen ari da. Aurreko edizioan bost bat lagun ginen eta oraingoan hamar eta hamabi artean gara, eta ilusio handiz bizi dugu".

Jarrera aktiboa

Antolatzaileek Euskaraldiaren aurrean zein euskararen aurrean jarrera aktiboa hartzeko deia egin dute, izena ematen duten unetik bertatik: batzordeetan parte hartuz, herrietan antolatutako ekitaldietara joanez eta, batez ere, zenbait hizkuntza ohitura aldatzeko ahalegina eginez.

Izan ere, ariketaren helburua euskara gehiago erabiltzea da, eta horretarako aldaketa zehatz batzuk proposatzen dira: elkarrizketa beti euskaraz hastea, eta ulertzen duenarekin euskaraz jarraitzea.