Euskadin, hamar pertsonatik seik egunero kontsumitzen dituzte sendagaiak

Euskadin 15 urte baino gehiagorekin bizi diren hamar pertsonatik seik medikamenturen bat kontsumitu ohi dute, EITB Datak egindako txosten baten arabera. Inkestak kontsumo horien arrazoiak aztertzen ditu, eta adierazten du % 29k minaren bati aurre egiteko hartzen dutela, % 25ek bihotzerako medikazioa eta % 17k osasun mentaleko arazoak direla-eta hartzen dituztela lasaigarriak, lo egiteko pilulak edo antidepresiboak.

Txosten horren arabera, edozein adinetan hartzen diren arren, kontsumoak gora egiten du pertsonen adinak gora egin ahala, batez ere 55 urtetik aurrera, eta herritarren % 90era iristen da 75 urtetik gorakoen artean, eta gaixotasun kronikoekin lotutako botikak hartzen dira.

Gazteen eta nerabeen antsietateari eta depresioari aurre egiteko sendagai gehiago

Nerabe eta gazteen artean antsietateari eta depresioari aurre egiteko botiken gorakada nabarmendu du. 15 eta 24 urtekoen artean, pertsonen % 3,4k osasun mentalerako botikak hartzen dituzte; ehuneko hori % 5,6ra igotzen da 25 eta 44 urte bitartean, % 15era 45 eta 64 urte bitartean, eta % 30era helduenak (65 urtetik gorakoak).

Osasun mentalerako botikaren bat hartzen duten 65 urtetik gorakoen erdiek, gutxi gorabehera, lo egiteko hartzen dute; gazteek, berriz, antsietateari edo depresioari aurre egiteko (% 86), eta 25-44 urte bitartekoek, % 70.

Azken hamarkadan nabarmen egin du gora kontsumitutako antidepresiboen kopuruak, % 35 Euskadin, Osasun Ministerioaren datuen arabera. Gainera, emakumeen % 17,5ek lo egiteko, antsietaterako edo depresioaren aurkako sendagaiak kontsumitzen dituzte, eta gizonen kasuan, berriz, % 9,7k. Medikazioaren kostu orokorrari dagokionez, Euskadi autonomia-erkidegoen zerrendako azken-aurreko postuan dago, gastu pertsonala eta diruz lagundutakoa batuta (319 euro pertsonako eta urteko); izan ere, Kataluniak 315 euro kontsumitzen ditu.