Eskola- garraioan eta jantokietan beste bi greba egun deitu dituzte

- Orain arte jantokietako eta eskola-garraioko zerbitzuetan ordezkaritza duten sindikatuek eta Hezkuntza Sailak bi bilera egin dituzte. Eusko Jaurlaritzak kolektiboek egiten dituzten eskaerei erantzun gabe jarraitzen duela jakinarazi zuen atzo ELAk. Hori horrela izanik, beste bi greba egun deitu ditu ELAk, otsailaren 23an eta 24an, ikastetxe publiko, pribatu eta itunduetako jantokietan eta eskola-garraioan.

Sindikatuaren arabera, Hezkun-tza Sailak hartutako erabakien ondorioz, 17.000 mahaikidek jantoki eskubidea galdu dute, eta ondorioz, aldi baterako 1.000 lanpostu "suntsitu" dira. Gainera, aldizkako beste 1.000 lanpostu finko inguru ezegonkotasun egoerara igaro dira, "errefortzu kontratuetan, enplegua mantentzeko bermerik gabe eta baldintza kaskarragoetan".

"2020-2021 ikasturterako eskola-jantokietan 180 milioi euro hornitu badira ere, eta itunpeko ikastetxeentzat eta ikastetxe pribatuentzat onartutako diru-laguntza ekonomikoak gorabehera, Hezkuntza Sailak ez du aurreikusi inoiz benetako errefortzurik", salatu zuen ELAk.

Protokolo zehatzik ez dagoela defendatu zuen sindikatuak eta horrek zerbitzuen segurtasunari, kalitateari eta langileen eta erabiltzaileen osasunerako eskubideari zuzenean eragiten diela uste du. "Gaur egungo erabakiek, zerbitzu-eskaintza txikiagoarekin eta Sailak mahai gainean jarritako hausnarketarekin, kolokan jartzen dute zerbitzu horien jarraitutasuna eta enpleguari eustea", adierazi zuen.

Jantokiak eta eskola-garraioak arautzen dituzten arauak berrikustea eta aplikatzea eskatzen du sindikatuak.