Espainiako Gobernuko presidentearen emaztea, Begoña Gómez, ikertzen ari den Juan Carlos Peinado epaileak hainbat salaketa aurkeztu ditu kargu politiko eta kazetarien aurka, haren aurkako kritikek ohorerako eskubidea urratu diotela iritzita.
Iturri juridikoek EFEri jakinarazi diotenez, hainbat adiskidetze-ekitaldi programatu dituzte lehen auzialdiko hainbat epaitegitan, Madrilgo Instrukzioko 41 zenbakiko Epaitegiko titularrak aurkeztutako demanden lehen urrats gisa.
'El Confidencial' egunkariak larunbat honetan aurreratu duenez, epaileak kritika horiek Justiziaren aurrera eramatea erabaki du, eta Oscar Puente Garraio ministroa deitu du auzitara.
Adiskidetze-ekitaldiak epailearen eta demandatuen arteko adostasunik gabe amaitzen badira –ez daude joatera behartuta–, magistratuak bide zibiletik jarraitu ahal izango du haien aurka, ohorerako eskubidea defendatzeko, edo zigor-bidetik, ustezko irain- eta kalumnia-delituengatik.
Ikerketa kritikatua
Peinado epaileak 2024ko apiriletik zuzentzen du Begoña Gomezen aurkako ikerketa, Pedro Sanchez Espainiako Gobernuko presidentearen emaztearen aurkakoa, ustezko delituengatik: influentzia trafikoa, negozioetako ustelkeria, intrusismoa, bidegabeko jabetzea eta diru publikoa bidegabe erabiltzea.
Madrilgo Probintzia Auzitegiak behin baino gehiagotan mugatu du haren ikerketa, eta Fiskaltzak eta defentsek gogor kritikatu dute prozeduraren barruan, baina baita kanpoan ere, hainbat kargudun politikok zalantzan jarri baitute magistratuaren jarduna.
