Motzak luze
mattin Treku eta Lazkao Txiki, biak ere ez ziren metro eta erditik askoz gehiago gora-tzen. “Txiki handia zinen zu” kantatzen zion Andoni Egañak Joxemieli, lazkaotarrari buruz ETBrako egin zituzten marrazki bizidunetan. Aheztarraren-tzat ere balio zuen horrek. Bertso-saio baten aurretik elkarrekin kalean oinez zihoazela, hankamotz bat ikusi omen zuten, bi makuluren laguntzaz pauso mantsoan.
- Ikusten al duk hankamotz hori? Gizajoa! -esan zuen Lazkao Txikik.
- Gizajoa? Hori gu baino gehiago duk, Joxemiel! -erantzun zion Mattinek.
- Gu baino gehiago?
- Bai, horrek zango bat dik motza, guk biak.
Kaxianok, Lizartzako itsuak, biziki maite zuen esku-pilota. Apenas huts egiten zuen asteburuetako telebista emankizunik. Eta kontatu ere aparteko graziaz kontatzen zituen: partida ederrik ikusi diagu aspaldian!
Nikolas Segurola fraide, artzain eta bertsolariak kontatzen du ondorengo pasadizoa. Gerra Zibilean Francoren alde borrokatutako errezildar batek besoa galdu zuen gudan. Kalte-ordain gisa, zaldi bat eman zioten, gurdi eta guzti. Harekin ibiltzen zen Azpeitirako joan-etorrian, mandatuak egiten, beti zerbaiten garraio. Egun batean bidea eragozten zion artalde batekin egin zuen topo.
- Orain ere traban al hago? - eraso zion besamotzak artzainari.
- Hi, hemen denok bizi behar diagu!
- Denok bizi? Ez zekiat hi nola bizi haizen, ardi herren gehiegi dituk artzain ona izateko...
- Demonio! Jar hadi heu lau-hankan, egingo duk herren galanta heuk ere!