Zizurkil: Plazida Otaño bertsolariari buruzko ipuin ilustratua kaleratu dute

Oihana Iguaranek jarri dizkio hitzak eta Maria Altunak egin dizkio ilustrazioak 'Plazida, oihartzunaren plaza' liburuari

25.11.2021 | 00:11
Maria Altuna ilustratzailea eta Oihana Iguaran bertsolaria. Argazkia: N.G.

Zizurkil – Plazida Otaño Odriozola bertsolari zizurkildarra bistara ateratzeko asmoz, Plazida, oihartzunaren plaza ipuin ilustratua sortu du Zizurkilgo Udalak. Oihana Iguaran bertsolari amasarrak jarri dizkio hi-tzak eta Maria Altuna artista zizurkildarrak egin ditu ilustrazioak.

1867ko otsailaren 18an jaio zen Plazida Otaño. Bertsolaria zen, eta emakumea. Hori dela eta, ez zen eszenatokietara igo, ez zuen plazako saioetan parte hartu, ez zuen bere trebetasuna jendaurrean aurkezteko aukerarik izan. Plazidaren ahotsa plazara ekartzea da gaur aurkezten dugun ipuin ilustratuaren helburua.

Larunbatean liburuaren irakurketa publikoa egingo dute herriko haurrek, Plazida Otaño liburutegian, 11.30ean hasita. Bestalde, hiru ikastetxeen artean egindako Plazidaren eskultura ere bistaratuko dute, liburutegian bertan. Ikastetxe bakoitzak eskulturaren zati bat egin du, eta larunbatean elkartu egingo dituzte, Plazidaren eskultura berezia osatzeko.

Liburuaren mila ale inprimatu dira. Lehen aleak interesa azaltzen duten herriko familiei emango zaizkie, larunbata ondoren. Lehen ale horietan, gainera, bi egileek sinatutako ilustrazio bat jasoko dute opari. Gainerantzean, Gipuzkoako liburutegiek ale bana jasoko dute, Plazidaren figurak zabalkundea izan dezan.

Hortik aurrera, liburua salgai jarriko da hamar eurotan, honako salmenta puntuetan: Plazida Otaño liburutegia, Villabonako Basajaun liburudenda eta Bilboko Anti liburutegia, Durangoko Azokan Bertsozale elkartearen postuan.

noticias de noticiasdegipuzkoa