- Euskara ikasteko urtero eskaintzen dituen laguntzak eskatzeko prozesuaren emaitzaren berri eman du Euskara arloak. Irunen erroldatutako 16 urtetik gorakoak euskalduntzeko laguntza-lerro bat da, eta euskara zerbitzuak sustatzen dituen ekimen sorta zabal baten barruan dago. Ekimen horien artean, dirulaguntzak izaten dira Euskararen Nazioarteko Egunaren inguruko ekintzetarako edo lantokietan hizkuntza sustatzeko ere.
Kasu honetan, deialdiaren betekizun guztiak betetzen zituzten 190 irundarrek laguntzak jasoko dituzte, 2019-2020 ikasturtean egindako euskara-ikastaroak diruz laguntzeko. Deialdi honek 63.350 euroko aurrekontua izan du eta guztira dirulaguntzak jasotzeko 230 lagun aurkeztu ziren. Horietatik 40 baztertu egin behar izan direla ere argitu dute Euskara arlotik, programaren betekizunak betetzen ez zituztelako. Eskaera gehienak Irungo edo eskualdeko zentroetan egindako ikasketen gainekoak dira.
