Aurten, Errege Magoek Azpeitiko Salbe auzokideei bisita egingo diete

Urtarrilaren 5eko arratsaldean iritsiko dira Meltxor, Gaspar eta Baltasar errege magoak Azpeitira, eta orduan hasiko da herriko umeek hainbeste espero duten eguna.

Aurten ere, karroza dotoreetan herriko hainbat kale zeharkatuko dituzte, gaztetxo ugariren laguntzaz, baina berrikuntza nabarmen batekin: aurten, lehen aldiz, Salbe auzotik ere igaroko dira.

Lasaotik trenean

Errege Magoen bisita arratsalde erdialdean hasiko da. 16.15 inguruan iritsiko dira Lasaora, eta handik txu-txu trena hartuta, 17.00ak bueltan, Soreasuko Sebastian Donearen parrokiara joango dira.

Bisita horren ondoren, atseden txiki bat hartuko dute, eta desfile nagusia 19.00etan hasiko da.

Ibilbidea

Kabalkada igerilekuaren aurretik abiatuko da, eta kalez kale ibili ostean, 20.00ak aldera plazara iristea aurreikusten da.

Ibilbideari dagokionez, aurtengo berritasunik handiena Salbe auzoaren bisita izango da: igerileku aurretik gorantz abiatu, ezkerrera hartu eta Salbe auzoan sartuko dira.

Jose Antonio Agirre plazaren ondotik igaro ondoren, berriro igerileku aurrera itzuliko dira, eta hortik aurrera aurreko urteetako ibilbide bera egingo dute:

Urbitarte auzotik, Jose Artetxe kaletik eta Goiko kaletik pasa, Alde Zaharreko lau kaleak zeharkatu, eta amaieran udaletxeko balkoitik herritarrei hitz batzuk eskainiko dizkiete.

Antolatzaileek ohartarazi dutenez, eguraldi txarra eginez gero, ibilbidea aldatzeko aukera egongo da.

Aldaketak autobus zerbitzuan

Kabalkada dela eta, 18.00etatik 20.00etara itxita egongo da epaitegiaren aurretik kanpoko igerilekuraino doan errepidea.

Ondorioz, Sanjuandegiko autobus geltokiak bertan behera geratuko dira, eta haien ordez Eskalben aurrean aldi baterako jarritako geltokiak erabiliko dira.

Erregeen pajeak, igandean

Bestalde, haurrek beren eskutitzak eman ahal izateko, igandean, 17.30etik aurrera, erregeen pajeak udaletxeko arkupean izango dira, txikienen mezuak jasotzen.