Erdi Aroko Azoka bueltan da Hondarribian
Larunbatean eta igandean egingo da azoka, 80 postu baino gehiago eta ikuskizun ugari eskainiz
HondarribikoErdi Aroko Azoka bueltan da asteburu honetan, ekainaren 7an eta 8an, eta udalerriko Alde Zaharra duela ehundaka urte nolakoa zen gogoratzeko parada paregabea eskainiko du berriz ere. Goizeko 10.00etatik 14.00etara eta arratsaldeko 17.00etatik 21.00etara, bisitariek garai bateko giroa bizitzeko aukera izango dute, jarduera, ikuskizun eta erakusketa ugarirekin.
Ortzi Alonso Kultura zinegotziak azaldu duenez, “egun batean izan zenera itzuliko da Hondarribia”, eta horretarako, antzinako kanpamenduak, arabiar haimak, eta aintzinako tresnen erakusketak egongo dira, besteak beste. “Udalerriko zenbait elkarteren laguntza ere izango dugu aurten ere, hala nola Marlaxka Xake Elkartea, Azeri Tiroketa Elkartea eta Jaitzubia Hipika Elkartearena”, gehitu du.
Zinegotziak nabarmendu du azokak geroz eta gune historiko gehiago hartzen dituela eta ezinbesteko hitzordu bihurtu dela: “Denetarik izango dugu: arotzak, errementariak, upelgileak, urreginak, harginak, kontu kontariak eta artzainak ardiekin. Guztira 80 postu baino gehiago egongo dira.”
Aurten, gainera, hiru berritasun nagusi izango ditu azokak. Alde batetik, Tinglaua txotxongiloen ikuskizuna egingo da Agustina Genua plazako eszenatokian, bi egunetan, 12.00etatik 20.00etara. Bestalde, Gipuzkoako Ilusionismo Elkartearen magia emanaldia Olazabal Parkean, bi egunetan ere. Azkenik, leku berean 'Sol de Loto' konpainiaren kalejira eta dantza-ikuskizunak egongo dira.
Horrez gain, ekainaren 16ra arte Arma Plazan ikusgai egongo da iazko azokako argazki-erakusketa. Gainera, aurten argazki lehiaketa berri bat ere antolatu da.
Hondarribiko Erdi Aroko Azokari buruzko informazio guztia esteka honetan topa daiteke.
Trafiko aldaketak
Azokak hurrengo kale eta plazak hartuko ditu: Arma plaza, San Nikolas kalea, Bretxa, Gipuzkoa plaza, Denda kalea, Fraxkueneko Murrua, Apezpiku kalea, Bikario Plazan eta Kasino Zaharreko jardinak.
Ondorioz, zenbait trafiko aldaketa izango dira: Kale Nagusia itxita egongo da autoentzat ostirala arratsaldean, eta larunbata eta igandean egun osoan. Alde Zaharretik ateratzeko, Denda kaletik eta Juan Laborda kaletik ezkerrera egin beharko da. Alde Zaharrera bakarrik baimenduek sartu ahal izango dute.