Kirol ikuskizuna izango da protagonista igande honetan. Mondraitz klubeko kideek antolatzen duten Arrasate-Udalatx mendi lasterketaren zortzigarren edizioak 400 korrikalari batuko ditu irteera puntuan (10.00etan Herriko Plazatik), horietatik 215 bailarakoak, eta hortik 126 arrasatearrak.
Udalatx
21 kilometroko ibilbidea eta 1.250 metroko desnibel positiboa dituen lasterketak aurreko urteetako osagai nagusiak mantenduko ditu, baina berrikuntzekin ere badator. Alde batetik, Etiketa berdea ekimenari atxiki zaio. “Kirol helburu soiletatik harago, lasterketa jasangarriago eta errespetuzkoago bat sortzeko xede amankomuna daukagu”, azpimarratu zuten antolatzaileek asteartean egindako aurkezpenean.
Parte-hartzaileen jatorriak ere probak lortu duen oihartzuna islatzen du: Bartzelona, Girona, Albacete edo Madrileko korrikalariek eman dute izena. Emakumezkoen presentzia, ordea, handituz doa eta aurten 43k parte hartuko dute.
Bestalde, Udalari esker lehen aldiz doako autobus zerbitzua eskainiko da Udala auzoan trafiko arazoak ekidi-teko. Beraz, Arrasate Pasealekuko autobus geltokitik (Arimazubi plaza alboan), bi autobus joan-etorrian jarraian arituko dira, 8.00etatik 13.30era bitartean. Goizean zehar, gainera, Udalara igotzeko errepidea ibilgailuentzat itxita egongo da.
Lasterketa zuzenean jarraitzeko aukera izango da streaming bidez (sarean ez ezik, Goiena.eus atarian eta Herriko Plazan jarriko duten pantaila erraldoian).
