Merezitako omenaldia Xabier Ugarte oñatiarrari

Euskaltzale eta kulturgile nekaezina izan zen Xabier Ugarte oñatiarra. Urtarrilaren 20an zendu zen, eta ostegunean, Korrika Kulturalaren baitan, herriaren omenaldia jaso zuen. Jende andana batu zen.

Musikariak, Oñati abesbatzako eta Artixako kideak izan ziren, beste batzuen artean, oholtza gainean. Korrika batzordeak eta Udalak oroigarri bana eman zieten Ugarteren senideei. Omenduak egindako lan ikaragarria goraipatu zen: musika ondarea berreskuratu eta zainduz (aipagarriak dira Aita Madina edo Jose de Azpiazuren artxiboekin gauzatutako lanak) eta euskaldunak alfabetatuz gau-eskoletan, besteak beste.