Gautenak hainbat ekimen jarri ditu abian autismoaren espektroko nahastea duten pertsonen senitartekoei laguntzeko. Horien artean, an-tzerki taldea. Ostiral honetan Zumarragan egongo dira. Antzerki saioa hasi aurretik, film labur bat emango dute. Sarrera doan izango da, borondatearen truke. Ekitaldia 19.00etan izango da, Zelai Arizti aretoan. Neurotipikook (autismoaren espektroko nahastea ez dugunok) neurodibergenteak (autismoaren espektroko nahastea dutenak) hobeto ezagutzeko eta beraiengana hurbiltzeko aukera izango dugu.
Planeta Ateneasp antzezlanaren gidoia Olatz Lizarralde donostiarrak idatzi du: neurotipiko talde bat neurodibergenteen planetara joango da, aktore lan bila. Izan ere, Ateneasp planetan obra bat prestatzen ari dira. Antzezlanean Gautenako kideek beraien errealitatearen berri emango dute eta neurodibergenteak eta neurotipikoak ez direla elkarren horren ezberdinak ikusiko da.
Lizarralde Gautenaren antzerki taldean lan egiten duen bi neurotipikoetako bat da. Bestea, Juanlu Escudero aktore zumarragarra da. Biak, Asperger sindromea duen Mikel Sagarzazu oñatiarrarekin batera, taldearen arduradunak dira.
Antzerki taldea duela 13 urte sortu zen. Egitasmoak arrakasta izan zuen eta handik hiru urtera bigarren antzerki talde bat sortu zen. “An-tzerkiak oso ondorio onak izan ditu. Sozializatzen lagundu die”, azaldu du Lizarraldek. Gidoiak bakoitzaren beharretara egokitzen dituzte. “Bakoitzak bere denborak ditu, ba-tzuk gehiago hitz egin nahi dute eta beste batzuk gutxiago...”.
Urtero antzezlan bat prestatzen dute. Ostiralero elkartzen dira, urritik ekainera bitartean. Ekaineko azken ostiralean, lana jendaurrean antzezten dute Lugaritzen.
Oraingoan Zumarragan arituko dira, ordea. “Pandemia dela eta, antzerki eskolak online egin genituen eta bi urte eman genituen lan hau aurrera ateratzen. Maiatzean aurkeztu behar izan genuen, ekainean Lugaritz hartuta zegoelako, eta ez ginen gustura gelditu. Hori dela eta, Zumarragan ere antzeztea proposatu nuen. Beraiei ez zaie lana behin baino gehiagotan antzeztea gustatu, baina baiezkoa eman zuten”, dio Escuderok.
Beste behin bakarrik antzeztu dute lan bera bi aldiz: osasun mentalaren inguruko antzerki topaketa batean (Bartzelonan) eta Donostiako gazte antzerki lehiaketan. Irabazi egin zuten, gainera.
Zumarragara etorrita, beraien lana Donostialdeatik kanpo ezagutzera emango dute. “Gure taldeko kide gehienak Donostia ingurukoak dira eta, hala, Gipuzkoa mendebaldera iritsiko gara. Gainera, Zumarragako Gautenako lokalera etortzen direnek antzerkiaren bidez lor daitekeena ikusiko dute”, esan du Sagarzazuk.
Asperger sindromea
Ikusleek autismoa hobeto ezagutzeko aukera ere izango dute. “Antzezlan honetan itzulingururik gabe hitz egiten da autismoaz. Olatzek kide guztion iritziak jaso zituen, nirea barne. Asperger sindromea dut eta antzerkiari esker nire zailtasunei, interakzio sozial ezari, aurre egin ahal izan diet. Programa pilotuan hasi nintzen eta, egindako lanari esker, irakasle lanera pasatzeko aukera eman zidaten. Zubi lanak egiten ditut. Izan ere, gainontzeko kideak Olatzek eta Juanluk baino hobeto ezagutzen ditut. Haurtzaro gogorra izan nuen eta antzeko arazoa dutenei lagundu ahal izateak asko pozten nau”, gehitu du.
Gautenaren antzerki taldean lan egiteaz gain, bikoizketa aktorea da eta hainbat filmetan figurantea izan da. Agur Etxebeste! eta El hoyon, adibidez. Asteburu honetan Zumarragan emango duten haurrentzako pelikulan ere lan egin du.
Escuderok ere berarentzat oso esperientzia “aberasgarria” dela dio. “Asko ikasi dut: enpatia gehiago izaten, pazientzia gehiago izaten...”.
