Irungo Udaleko Euskara arloak antolatzen duen ekimen garrantzitsuenetarikoa da Familia Ola programa. Izan ere, 2009an familiartean euskararen transmisioa sendotzeko proiektu baten barnean sortu zen, eta, ordutik, ikasgeletatik haratago euskararen erabilera sustatzeko tresna paregabea izan da.
Miren Echeveste Euskara zinegotziak atzo iragarri zuenez, Familia Olak edizio berri bat ospatuko du aurten, eta dagoeneko azarorako zenbait jarduera prestatu dira.
Hala, azaroaren 15ean eta 17an 17.30etik 19.00etara, gorputz-adierazpen tailerrak egingo dira, joko kolektiboekin eta musikarekin. Ondoren, azaroaren 20an, Donostiako Aquariuma bisitatzeko aukera egongo da, 11.00etatik aurrera, itsasoan bizi diren animaliak ezagutzeko. Amaitzeko, azaroaren 22an eta 24an, 17.30etik 19.00etara, Jone Taberna artistak ilustrazio tailer bat eskainiko du.
Ekimen hauetan parte hartzeko ezinbestekoa da Irunen erroldatuta egotea edo hiriko ikastetxe batean matrikulatuta egotea. Izena emateko epea urriaren 30ean amaituko da, irun.org webgunean.
Aldi berean, Echeveste zinegotziak Euskara arloko beste programa baten berri eman zuen atzo: Haurrak Parkean. Ekimen honen bidez, Udalak euskaraz jolasteko baliabideak eskaini nahi dizkie familia eta haurrei herriko hainbat auzo eta jolasgunetan. Bertaratzen diren haurren adinaren arabera, bi talde eratzen dira, 3 eta 5 urte bitarteko haurrekin, eta 6 eta 9 urte bitarteko haurrekin, bi hezitzailerekin batera.
Haurrak Parkean ekimena Nagore Laffage eta Partxis parkeetan egingo da asteazkenetan eta Arbiun plazako frontoian eta San Juan plazan ostiraletan, urriaren 19tik azaroaren 11ra.
