Bost lanpostu betetzeko deialdia ireki du Udalak
Lanbiderekin batera kudeatuko dira kontratazioak, enplegua sustatzeko helburuarekin
- Hondarribiko Udalak bost pertsona kontrata-tzeko deialdia egin du, Lanbide Euskal Enplegu Zerbitzuarekin batera. Hiriko Pertsonal eta Antolamendurako zinegotziak, Juan Mari Altunak atzo azaldu zuenez, Lanbiderekin batera enplegua sustatzeko egin ohi diren ekimenetako bat da. Deialdian parte hartzeko, ezinbestekoa da eskatzaileak gaur egun langabezian egotea. "Une hauetan, langabezi tasa Hondarribian %6,6koa da, eta Udaletik etengabe lanean ari gara ahal den neurrian tasa hori jaitsi dadin", zioen atzo Altunak. Hala, denetara bost pertsona kontratatuko dira: bi arkitekto, beste bi arkitekto tekniko eta turismoa eta merkatari-tza landuko dituen teknikari bat. Oinarriak Hondarribiko Udalaren web orrian argitaratuak daude (www.hondarribia.eus), Lan Eskaintza atalaren barruan, baina eskaerak Lanbideren web orriaren bitartez egin behar da.