Ruper Ordorikak kontzertua eskainiko du 'etxean'

oñati - Ruper Ordorikaren musikaz gozatzeko aukera egongo da datorren igandean Oñatiko Santa Ana antzokian. Mugalariak taldearekin igoko da taula gainera musikari oñatiarra: Arkaitz Miner (gitarra, biolina eta mandolina), Hasier Oleaga (bateria) eta Lutxo Neira (baxua).

Kafe antzokian izenburuarekin jaio zen Ordorikaren azken diskoa, zuzenean grabatu eta argitaratzen duen hirugarrena. 2018ko abenduaren 15 eta 16an Bilboko Kafe antzokian eskainitako kontzertuen emaitza zaindua biltzen du. Sasoi ezberdinetako kantak dira eta Oñatin bide beretik joko du. Udaleko Kultura sailak antolatutako emanaldia 19.00etan hasiko da. Sarrerak salgai daude Txokolateixian eta leihatila digitalean, 12 euroren truke.- A.D.