Petrolioaren munduko kontsumoak gora egiten jarraituko du 2045era arte gutxienez, LPEEk atzo iragarri zuenez. Aurreikuspen hori ez dator bat Energiaren Nazioarteko Agentziaren iritziarekin, 2030erako iragarri baitu erregai fosilen munduko eskariaren gailurra eta behin betiko gainbehera.
Atzo Riaden aurkeztu zuen Munduko Petrolio Merkatuaren Aurreikuspenak 2023 (WOO 2023) urteko txostenean, Lurralde Petrolio Esportatzaileen Erakundeak (LPEE) munduko energia-eskaria 2045era arte %23 haziko dela aurreikusi du, eta, orduan, egunean 359 milioi petrolio-upel baliokide beharko omen lirateke, iaz baino %23 gehiago. Energia eolikoa eta eguzki-energia erritmo biziagoan hazten ari badira ere, mende erdialdera arte petrolioak eutsi dio kuota handienari energiaren “mix”-ean. LPEEren aurreikuspenetan eskaria murriztuko lukeen iturri bakarra ikatza litzateke.
Egoera horren aurrean, erakundeak “ezinbestekotzat” jotzen du sektore horretan 14 bilioi dolar inguru, batez beste 610.000 milioi dolar urtean, inbertitzea. Oso bestelakoa da Nazioarteko Agentziaren planteamendua, energia-sektorean mende erdirako “zero CO2 isurketa” atmosferiko izatera iristeko Ibilbide Orrian, erregai-fosilen munduko eskaria %25 murriztearen aldeko apustua egin baitu 2030era arte, eta %80 2050erako, energia berriztagarrietan inbertsio masiboak eginez.
LPEEk, aldiz, argi adierazi du ez duela aurreikusten energiaren sektorearekin lotutako karbono dioxidoaren (CO2) emisioak 2035aren aurretik hazteari uztea, orduan 35.700 milioi tonako gailurrera iritsiko liratekeelarik, 2022an baino %4 gehiago; handik aurrera hasi omen liteke jaitsiera apala, 2045ean 34.000 mt inguruan geratuz. Alde batetik, munduko petrolio-industriari, eta, bestetik, IEAko nazio industrializatu nagusiei dagozkien irizpide erabat kontrajarri horiek, oso negoziaketa zaila aurreikusten dute azaroaren 30erako Dubain deitutako COP28 goi-bilera klimatikoan. Hilaren hasieran aurreratu zuen Fatih Birol AIEko zuzendari exekutiboak Madrilen, Dubain konpromiso irmoak lortu nahi dituela erregai fosilen erabilera murrizteko eta iturri berriztagarrietan inbertsioak hirukoizteko.
Estrategia horren harira defenda-tzen du IEAk, ez direla premiazkoak “iraupen luzeko petrolio- eta gas-erauzketako proiektu berriak”, eta sektorerako kapital-fluxuak “lehendik badauden petrolio- eta gas-aktibo batzuetara mugatu beharko liratekeela”, bai eta dagoeneko onartuta dauden proiektuetara ere.
“Petrolio-proiektu berrietan inbertsioak geldiarazteko aldarrikapenak okerrak dira, eta kaos energetiko eta ekonomikoa eragin dezakete” dio, aldiz, txostenaren sarreran LPEEko idazkari nagusi Haitham Al Ghais kuwaitarrak.” Historia zurrunbilo ugariz beteta dago, eta horiek oso presente izan beharko genituzke, arduradun politikoak energia elektrikoaren konplexutasunaz behar bezala jabetzen ez direnerako”, ohartarazi zuen.
LPEEko adituek txostenean gogorarazi dutenez, Errusiak Ukraina inbaditzea bezalako gatazka geopolitiko bat nahikoa izan zen, energiaren kostuei eta segurtasunari buruzko kezka politika energetikoa ardatz bihurtzeko, berotegi-efektuko emisioen murrizketa bigarren mailara baztertuz.
