Langile eta hilabete bakoitzeko lan-kostua 3.378,51 eurokoa izan zen Euskal Autonomia Erkidegoan urteko bigarren hiruhilekoan, hau da, %6,9ko igoera izan zen 2022ko aldi berarekin alderatuz gero, estatuko batez bestekoa (%5,8) baino handiagoa.
Langile bakoitzeko lan-kostu handiena duen bigarren erkidegoa da Euskadi, Madrilen atzetik (3.562,11 euro). Euskadin, urtetik urterako laugarren hazkunde handiena izan zen, Balear Uharteetan (+% 10,9), Nafarroan (+% 8,3) eta Asturiasen (+% 7,2) atzetik.
Estatuko batezbestekoa
Ostiral honetan Estatistika Institutu Nazionalak (INE) argitaratutako lan-kostuari buruzko hiruhileko inkestaren arabera, Estatuko batez besteko kostu totaletik (3.037,52 euro), 2.262,63 euro soldatei dagozkie eta 717,58 euro Gizarte Segurantzako nahitaezko kotizazioei; gainerakoa, berriz, kalte-ordainei edo gizarte-prestazioei dagokie, besteak beste.
Soldata-kostua %5 igo da aurreko urtearen aldean, eta gora egin du hamar hiruhilekotan, 2023rako lanbidearteko gutxieneko soldata (LGS) %8 igo baita, eta hitzarmen kolektiboan itundutako soldaten %3,26. Igoera hori %4,21era iritsi da lehen seihilekoan sinatutako hitzarmen berrietan.
Orduko
Ordaindutako ordu bakoitzeko soldata 17,3 eurokoa izan zen bigarren hiruhilekoan, % 5,8 gehiago. Alde handiak daude lanaldi osoko (18,12 euro, % 5,8 gehiago) eta lanaldi partzialeko (12,28 euro, % 6,2 gehiago) langileen artean.
Soldata-kostuak jarduera guztietan igo ziren, energia elektrikoaren horniduran eta ur-horniduran izan ezik, horiek %7,4 eta %2,1 jaitsi baitziren, hurrenez hurren. Igoera handienak jarduera administratiboetan (%7,8) eta ostalaritzan (%7,7) izan ziren.
Madrilen lan kostua estatuko batez bestekoa baino 300 euro handiagoa zen, eta Extremaduran eta Kanarietan, berriz, batez bestekoa baino txikiagoa.
Madrilgo batez besteko soldata, altuena, 2.702,65 eurokoa zen hilean, Extremadurako 1.781,61 eurotik urrun.
