Udazken jaia ospatuko dute igeldotarrek asteburuan

Donosita. Udazkenaren etorrera ospatzeko, igeldotarrek jai berezia antolatu dute asteburu honetarako. Bihar bertan hasiko dira festak: 17.00etan, txokolatada izango dute eta, 17.30ean, udazkeneko azokaren prestakuntza.

Igeldoko frontoiaren lehen mendeurrena dela eta, auzokideek egitarau berezi bat prestatu dute azpiegiturarekin zuzenki lotuta dagoena. Honen adierazgarri da larunbatean frontoian bertan egingo diren pilota partiduak. 11.00etan, barrene herrikoia izango da eta nahi duen orok parte har dezake. Modu berean, 17.30ean, pilota lehiaketako finalak izango dira, baina, aurretik, oroigarri bat jarriko da frontoiean mendeurrena gogoratzeko.

Eskolan ere izango dira ekintzak. Antolatzaileek sorpresa bat iragarri dute 19.30etarako. Kixmiko irteeran Getariara joan zirenen umeekin erlazioa izango du sorpresak.

20.00etan, aldiz, antzerkia izango da eskolan. Ispilua antzezlana eskainiko du Aldatzen laguntzen antzerki taldeak -sarrerak hiru euroko prezioa du-. Eguna buka-tzeko, berriz, 21.30ean, barrikotea izango da plazan.

Igandeko egitarauari erreparatuz, goizean goiz hasiko dira ekitaldiak. 10.30etatik 13.30etara, Igeldoko produktu eta ganaduaren azoka izango da -10.30ean ere meza ospatuko da-. Ordu erdi geroago, Jubilatuentzat hamaiketakoa izango da Kultur etxean. 14.00etan, hemen ere, bazkaria ospatuko da. Din Din elkarteak prestatuko du eta helduentzako 23 euroko prezioa izango du eta haurrenak, berriz, 15. Buena Vista, Txistu eta Txapela tabernetan eskuratu daitezke bazkarirako txartelak.

Amaitu ondoren, Ibai Esoain eta Imanol Lizarazu bertsolarien saioez gozatzeko parada izango da. Bazkarian, Igeldoko aiton-amona zaharrenak omenduko dituzte.

Asteburuari amaiera emateko, 18.00etan, taloak salduko dira herriko plazan. Ordu eta leku berean herri jolasak ere izango dira.